Rasynda da solai. Taý etegindegi aimaqtyń sulý tabiǵaty talailardy tamsandyrady. Máselen, Aqsý-Jabaǵyly memlekettik qoryǵyna jyl saiyn 45 myńdai týrist keledi eken. Ásirese, sheteldikterdiń yqylasy joǵary. Túlkibastyqtardyń týrister talabyn qanaǵattandyrýǵa degen talpynysy qýantady. Taiaýda Kereit aýylynda jalpy quny 1 mlrd. 200 mln. teńgeniń otbasylyq demalys kesheni ashyldy. Ortalyq bir mezette myń adamdy qabyldai alady. Jýyrda Jabaǵyly aýylynda jalpy quny 350 mln. teńgelik 70 oryndy «Jailaý» emdeý-saýyqtyrý ortalyǵy paidalanýǵa berilmek. Onyń ústine «Batys Eýropa-Batys Qytai» halyqaralyq dálizindegi jol boiynan jolaýshylarǵa arnalǵan servistik qyzmet kórsetý ortalyǵy iske qosylady. Bul jańa ákim kelgeli júzege asyp jatqan ilkimdi ister.
Túlkibas aýdanynyń ákimi Nurbol Turashbekovtiń bul qyzmetke taǵaiyndalǵanyna áli tórt ai tola qoiǵan joq. Degenmen, kóńil qýantarlyq igi ister barshylyq. Aimaqtyq kommýnikatsiialar qyzmetinde ótken brifingte Nurbol Ábsattaruly osy merzim ishinde atqarylǵan jumystar týraly áńgimelep berdi.
«Sastóbe tsement» zaýyty 1 mlrd. 381 mln. teńgeniń qaita jańǵyrtý jumystaryn oidaǵydai júrgizip, qazir tsementtiń túrli-tústi 7 markasyn shyǵarýda. Eki qazandyq «kógildir otynnan» qatty otynǵa ótip, ainalmaly qazandyqtarǵa aýystyryldy. Indýstrialdy kartaǵa 6 jylda 8 joba engizilip, onyń tórteýi iske asty. Aýdannyń áleýmettik-ekonomikalyq damýyn arttyrý maqsatynda 1 iri, 7 orta, 23 kishi, 8 qosalqy – barlyǵy 39 kásiporyn jyl basynan 8 630 mln. teńgege jýyq ónim óndirdi. Kásipkerlik salada jumys isteitinder sany 17 myń adamnan asty.
Aýdan ákimi sondai-aq, kooperativter qurý, baý sharýashylyǵyn damytý, mal bordaqylaityn alańdar men sút óndiretin fermalar ashý, «Nurly jer» baǵdarlamasynyń oryndalýy týraly atqarylǵan jumystardy tilge tiek etip, jýrnalisterdiń suraqtaryna jaýap berdi.
Serikqali JEKSENBAEV, «Ońtústik Qazaqstan».
