Grantpen oqyǵan túlek óz daiyndyq baǵyty boiynsha jekemenshik uiymdarda esh kedergisiz jumys istei alady. Bul týraly Bilim jáne ǵylym ministri Ashat Aimaǵambetov málim etti, dep habarlaidy "Ult aqparat".
«Memlekettik grant arqyly oqýǵa túsken stýdentterdiń grantty jumyspen óteý sharttary jeńildetildi. Endi túlekter tek memlekettik mekemelerde ǵana emes, jekemenshik uiymdarda da jumys istep, granttaryn ótei alady. Basty shart – daiyndyq baǵyty (mamandyǵy) boiynsha jumys isteýi tiis», - dep túsindirdi ministr áleýmettik jelidegi paraqshasynda.
Onyń aitýynsha, bul máseleni túlekter jii kóteretin. Jańa norma túrli uiymdardaǵy kadr máselesin sheshýge de septigin tigizedi.
Sondai-aq túlekterdiń jumyspen qamtylý múmkindikterin keńeitýge jol ashady.
«Mysaly, stýdent aýyldyq kvota arqyly farmatsevtika baǵyty boiynsha oqýyn aiaqtady delik. Keiin ol aýylǵa baryp, óz mamandyǵy boiynsha memlekettik uiymda jumys isteýge mindetti bolatyn.
Al, aýylda memlekettik dárihana joq bolsa she? Túlektiń qiyn jaǵdaiǵa tap bolatyny anyq. Sondyqtan bul másele de sheshimin tapty.
Qazir memlekettik-jekeshelik áriptestik damyp keledi jáne memlekettik tapsyrys jekemenshik balabaqshalarda, mektepter men aýrýhanalarda ornalastyrylyp jatyr. Endigi kezekte grantpen oqyǵan túlek óz daiyndyq baǵyty boiynsha jekemenshik uiymdarda esh kedergisiz jumys istei alady», - dedi A. Aimaǵambetov.
