15 qarasha ulttyq valiýtamyz – teńgeniń ainalymǵa engen kúni. Bul qarjy sektory qyzmetkerleriniń kásibi merekesi – Qarjygerler kúnimen de tikelei bailanysty. Biyl ulttyq valiýtamyz – teńgeniń ainalysqy engenine sonaý 1993 jyldan bastap 25 jyl toldy. Osy jiyrma bes jyl ishinde aýdannyń qarjygerleri de el ekonomikasynyń temirqazyǵy sanalatyn teńgeniń turaqtanýyna eleýli úles qosty.
Osy oraida, búgin aýdandyq mádeniet saraiynda Ulttyq valiýta - Teńge kúni men qarjygerler kúni merekesi saltanatty jaǵdaida atalyp ótti. Atalǵan sharaǵa aýdan ákimi Erlan Aitahanov arnaiy qatysyp, qarjygerlerdi tól merekelerimen quttyqtady.
Aýdan ákimi óz sózinde: «Búgingi kún tek qarjygerlerdiń ǵana emes, Ulttyq valiýtany, iaǵni teńgemizdi kúndelikti qoldanatyn barsha qazaqstandyqtardyń merekesi deýge ábden bolady. Memleketimizdiń Tuńǵysh Prezidenti Nursultan Ábishuly Nazarbaev osydan 25 jyl buryn, iaǵni 1993 jyldyń 15 qarashasynda Egemen elimizdiń tól teńgesin ainalymǵa engizdi. Bul qadamdy danalyq, kóregendik, eldiń bolashaǵyn tereńnen oilaǵandyq dep baǵalaýǵa bolady. Táýelsizdigimizdiń dańǵyl bolashaǵyna túsken memleketimizdiń ekonomikasy búginde qarqyndy damyp keledi. Munyń bári qarjygerlerimizdiń Qazaqstan ekonomikasynyń qarjylyq áleýetin damytýǵa jáne ony kúsheitýge, sondai-aq kásipkerlik sektorynyń qarjy jaǵynan yrysty-berekeli bolýyna múmkindik týǵyzýǵa baǵyttalǵan eren jumystarynyń arqasy dep bilemin», - dei kele, qarjy salasy mamandarynyń aldaǵy jumystaryna sáttilik tiledi.
Munan soń aýdan basshysy aýdanymyzdyń ekonomikalyq damýy jolynda aianbai eńbek etip kele jatqan bir top qarjygerlerdi «Alǵys hattarmen» marapattady.
Merekelik shara odan ári aýdan ónerpazdarynyń kontserttik baǵdarlamasyna ulasyp, áýezdi án men áserli bidiń qyzyǵyna batqan kópshilik kóterińki kóńil-kúimen tarqasty.
Otyrar aýdany ákimdiginiń baspasóz qyzmeti
