AQSh-tyń Reseidegi burynǵy elshisi, AQSh barlaý qyzmetiniń (TsRÝ) direktory Ýiliam Berns Resei basshysy Vladimir Pýtinniń densaýlyǵynda esh kinárat joq dep sanaidy. Aspendegi qaýipsizdik forýmynda jýrnalisterdiń suraqtaryna jaýap bergen Ýiliam Berns osyndai pikir aitty. Onyń sózinen Politico jýrnaly úzindi keltiredi, dep habarlady Azattyq.
"Ol tipti óte saý dep aita alamyz" dedi Berns. Sheneýnik bul barlaý qyzmetiniń resmi málimdemesi emes ekenin de eskertken.
Áleýmettik jeli qoldanýshylary osy aptada Iranǵa barǵan Resei prezidentiniń keibir jerde sál aqsańdaǵanyn talqylaǵan.
Mamyr aiynda Ýkraina barlaý qyzmetiniń jetekshisi Kirill Býdanov Resei prezidentiniń "aýyr syrqat" ekenin aitqan. Maýsymda bul jóninde Ýkraina basshysy Vladimir Zelenskii de málimdegen.
Maýsymnyń basynda Aq úidegi qupiia derekkózderge súiengen Newsweek basylymy Pýtinniń sáýir aiynda qaterli isik aýrýynyń sońǵy satysyn emdeý kýrsynan ótkenin jazǵan. Basylym málimetinshe, sáýirdiń aiaǵy men mamyrdyń ortasyna deiin Amerikanyń barlaý qyzmeti Pýtin qatty aýyryp, tipti ólim aýzynda jatyr degen derekti tekserip, sondai tujyrymǵa kelgen. Newsweek-tiń jazýyna qaraǵanda, koronavirýs indetin syltaý etip, oqshaýlaný arqyly ol dertin jasyrýǵa tyrysqan. Al AQSh qaýipsizdik keńesiniń ókili aqparatty joqqa shyǵarǵan. Ol barlaý qyzmetinde ondai tujyrym jasalmaǵanyn jáne prezident Djo Baidenge baiandalmaǵanyn aitqan.
Al, sáýirdiń basynda "Proekt" basylymy 69 jastaǵy prezidentke sońǵy jyldary lor men hirýrg jii ushyp baryp júrgenin habarlaǵan. Egde kisilerdiń qalqansha bezindegi isikti osy mamandar emdeitini málim.
Kreml ádette prezidenttiń densaýlyǵy týraly málimet taratpaidy. Alaida Pýtinniń baspasóz hatshysy Dmitrii Peskov "Proekt" aqparatyn "oidan qurastyrylǵan" dep atap, prezidenttiń deni saý ekenin málimdegen.
Sońǵy ret Kreml prezidenttiń densaýlyǵynda kinárat bar ekenin 2012 jyly moiyndaǵan. Ol kezde Pýtinniń belin aýyrtyp alǵanyn habarlaǵan.
