Qazaqstannyń densaýlyq saqtaý ministri Aleksei Tsoi Dúniejúzilik densaýlyq saqtaý uiymyna silteme jasai otyryp, koronavirýstyń jańa "omikron" shtamy týraly jańartylǵan derekterdi jariialady, - dep habarlaidy Tengrinews.kz tilshisi.
"Omikron" týraly jańartylǵan aqparat. Qysqasha mazmuny: zertteý jalǵasyp jatyr, al barlyq qorytyndy basqa nusqalardaǵy uqsas mýtatsiialar týraly tájiribe men bilimge negizdelgen.
Tasymaldaný áleýeti: "omikron" basqa shtamdarǵa qaraǵanda qalai taralatyny áli belgisiz. Iá, Ońtústik Afrikada qazir bul shtamdy juqtyrý deregi kóbeigen, biraq epidemiologiialyq zertteýler aiaqtalǵanǵa deiin bul nusqanyń taralý áleýeti artqany týraly naqty qorytyndy jasaýǵa bolmaidy", - dep jazdy Tsoi Facebook-te.
Onyń aitýynsha, sondai-aq "omikron" shtamy densaýlyqqa qanshalyqty aýyr jaǵdai týǵyzatyny áli belgisiz.
"Ázirge "omikron" belgileri COVID-19-dyń basqa nusqalarynan qalai erekshelenetini týraly eshqandai dálel joq. Aldyn ala málimet Ońtústik Afrikada aýrýhanaǵa jatqyzý jiiligi kóbeigenin kórsetedi, biraq aýrýhanaǵa jatqyzý qaýiptiń aldyn alýǵa bailanysty bolýy múmkin.
Tabiǵi immýnitettiń tiimdiligi (aýyrǵan adamdarda): aldyn ala derekter basqa nusqalarmen salystyrǵanda "omikrondy" qaita juqtyrý qaýpi joǵary bolýy múmkin ekenin kórsetedi, biraq derekter az", - dedi ministr.
Onyń aitýynsha, DDSU "omikronnyń" vaktsina tiimdiligine yqtimal áserin baǵalaidy. Qazirgi ýaqytta vaktsinalar virýsqa qarsy óte tiimdi qural. Keńinen qoldanylatyn synama júieleri "omikrondy" tiimdi anyqtap jatyr.
Terapiianyń paidalylyǵy týraly aita kele, ministr kortikosteroidtar men interleikin-6 tejegishteri "omikron" nusqasynan týyndaǵan aýrýdy emdeýde tiimdi ekenin atap ótti. Basqa emdik quraldardyń (sonyń ishinde monoklonaldy antidenelerdiń) tiimdiligi zertteletin bolady.
