QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda elimizdegi epidemiologiialyq jaǵdai qaraldy. Koronavirýs infektsiiasynyń taralýymen kúresý boiynsha aǵymdaǵy ahýal men elimizde qabyldanyp jatqan sharalar týraly densaýlyq saqtaý ministri Aleksei Tsoi baiandady, dep habarlaidy primeminister.kz saity.
Qazirgi ýaqytta Qazaqstanda koronavirýs infektsiiasymen syrqattanýshylyq boiynsha epidemiologiialyq jaǵdaidy turaqtandyrýǵa qol jetkizildi. Sonymen, 30 qyrkúiektegi jaǵdai boiynsha 107 908 naýqas tirkelgen, sońǵy táýlikte COVID-19 oń nátijesimen 75 adam tirkelgen, 1 731 qaitys boldy.
Koronavirýs infektsiiasynyń 32 799 yqtimal jaǵdaiy tirkeldi (PTR), táýlik ishinde – 299 adam, onyń ishinde 353 adam qaitys boldy.
Ministr oqýshylar arasyndaǵy syrqattanýshylyqqa jeke toqtaldy. Oqý jylynyń basynan beri oqýshylardyń arasynda KVI aýyrýdyń 104 jaǵdaiy, onyń ishinde kezekshi synyptarda oqityn balalar arasynda 33 jaǵdai tirkeldi, bailanysta bolǵan 550 adam anyqtaldy, olardyń ishinde 7 jaǵdai anyqtaldy.
Qashyqtyqtan oqityn balalardyń arasynda 71 jaǵdai tirkelse, onyń ishinde 240 bailanysta bolǵandarmen 15 jaǵdai anyqtaldy.
«Bul rette oqý 100% oflain rejimde bolǵan jaǵdaida aýyrǵandarmen bailanysta bolǵandardyń sany kem degende 1500 adamǵa deiin ósip, oqýshylar, mektep personaly jáne otbasy músheleri arasynda syrqattanýshylyqtyń yqtimal taralýyna ákep soqtyrýy múmkin edi», — dedi Tsoi.
Densaýlyq saqtaý ministrligi epidemiologiialyq jaǵdaidy matritsaǵa sáikes jáne 30 qyrkúiektegi jaǵdai boiynsha baǵalaýdy jalǵastyrýda, qyzyl jáne sary aimaqtarda qalǵan óńirler joq, el boiynsha jaǵdai turaqty, barlyq óńirler jasyl aimaqta.
Ministrdiń aitýynsha, álemde KVI-men syrqattanýshylyq jáne sonyń saldarynan ólim-jitim kóbeiip otyr. Eýropa men Aziianyń keibir elderinde syrqattanýshylyqtyń ósýi jalǵasýda.
Ótken aptada syrqattanýshylyqtyń ósýi Italiiada, Germaniiada, Belarýsta baiqaldy. Resei Federatsiiasynda 0,6-dan 0,7%-ǵa deiin (sońǵy táýlikte – 8238 jaǵdai), Túrkiiada 0,6-ǵa deiin (sońǵy táýlikte – 1 427 jaǵdai) ósti.
«Bul rette, syrqattanýshylyqtyń ósýi tirkelgen kóptegen elderde karantin sharalary qaita engiziledi, bul olardyń koronavirýs infektsiiasymen kúresýde jáne onyń profilaktikasynda tiimdiligin taǵy da aiqyn kórsetip otyr», — dedi Tsoi.
Vedomstvo basshysy atap ótkendei, Qazaqstandaǵy epidemiologiialyq jaǵdaidyń turaqtanýyna qaramastan, halyqtyń saqtaný deńgeii álsirep bara jatyr. Maska kiiý jáne áleýmettik qashyqtyqty saqtaý boiynsha sharalar árdaiym saqtalmaidy, bul syrqattanýshylyqtyń taralýyna jáne tiisinshe búgingi kúni álemniń kóptegen elderinde bolyp otyrǵandai, Qazaqstanda da karantin rejimin qatańdatý qajettiligine alyp kelýi múmkin.
«Reidterdiń nátijesi karantin rejimin álsiretý sátinen bastap karantindi buzý 30,4%-dan 40,7%-ǵa deiin ulǵaiyp jatqanyn kórsetti. 10 óńirde karantindi buzý sanynyń ósýi baiqalady. Sondai-aq azamattardyń maska rejimin buzýshylyqtary da azaimai otyr. 5-27 qyrkúiek aralyǵynda ákimshilik jaýapkershilikke 1131 adam tartyldy», — dedi Tsoi.
Shetelderdegi jaǵdaidyń nasharlaýyn eskere otyryp, infektsiianyń ákelinýi men taralýynyń aldyn alý maqsatynda 5 qazannan bastap mynalar usynylady:
- basqa eldermen áýe qatynastaryn qalpyna keltirýdi toqtata turý;
- áýe qatynasy jandandyrylǵan eldermen áýe reisteriniń sanyn ulǵaitpaý;
- Túrkiiaǵa ushýlar sanyn azaitý.
Ekinshi sanattaǵy elderden keletin adamdar úshin mynadai mindetti talaptar belgilensin: termometriia, saýalnama, alynǵan kúninen bastap 3 táýlikten aspaǵan ýaqytqa deiingi COVID-19-ǵa tekserý týraly anyqtamasynyń bolýy.
Anyqtamasy bolmaǵan jaǵdaida kelýshiler karantindik statsionarda COVID-19-ǵa zerthanalyq tekserý júrgizý úshin 2 táýlikke deiin oqshaýlanady.
Osyndai talaptardy EAEO elderimen jáne Ózbekstanmen avtoótpe joldarynda ótkizý pýnktterinde memlekettik shekarany kesip ótetin adamdarǵa qoldaný usynylady.
Budan basqa, ministrdiń aitýynsha, infektsiianyń taralýyn boldyrmaý jáne aýrýdyń yqtimal ósýine daiyndalý úshin mynadai sharalar qabyldanady.
Birinshi. Dári-dármekpen qamtamasyz etý máseleleri boiynsha birqatar jedel sharalar qabyldandy. Óńirler 14 mlrd teńge somasyna 91 dári-dármek ataýy boiynsha qosymsha qajettilikti málimdedi. COVID-19 boiynsha 14 mlrd teńgege eki ailyq dárilik zattar qory quryldy (tómendetilmeitin qor), qazirdiń ózinde 100% tiep jóneltildi.
Barlyq óńirlerde barynsha suranysqa ie dárilik zattar boiynsha jalpy somasy shamamen 13 mlrd teńgege turaqtandyrý qorlary quryldy.
Ambýlatoriialyq deńgeide preparattar tizbesi keńeitildi, dárilik zattardyń 5 ataýyn qamtityn COVID-19 nozologiiasy engizildi. Úide koronavirýstan emdelý úshin jyl sońyna deiin 1 mln patsientke tegin dári-dármek taratý kózdelgen.
Sondai-aq halyqtyń osal toptaryn vaktsinatsiialaý úshin tumaýǵa qarsy vaktsinanyń 2,2 mln dozasy satyp alyndy, vaktsinatsiialaý 15 qyrkúiekte bastaldy, búgingi kúni shamamen 1 mln adam nemese tiisti halyqtyń 44%-y egildi.
«Eldiń COVID-19-ǵa qarsy vaktsinaǵa qajettiligin qamtamasyz etý úshin biz vaktsina salynatyn táýekel toptaryn aiqyndadyq. Bul sozylmaly aýrýlary bar, 60 jastan asqan adamdar, meditsina qyzmetkerleri men pedagogtar. Respýblika boiynsha tiisti adamdardyń aldyn ala sany 2,8 mln adamdy nemese búkil halyqtyń 15%-yn quraidy», — dedi Tsoi.
Ekinshi. Aǵymdaǵy jyldyń qazan aiynyń sońyna deiin 11 oblys ortalyǵy men Almaty qalasynda 3 100 tósek-oryndyq 13 modýldi infektsiialyq aýrýhanany salýdy aiaqtaý, sondai-aq eki obektini jóndeý josparlanýda.
Úshinshi. Qazirgi ýaqytta infektsiialyq jáne provizorlyq statsionarlarda 3 379 ÓJJ apparaty bar, qosymsha 2 619 birlik, onyń ishinde 1 500 otandyq óndiristegi apparat satyp alynady.
QR-da 21 myńnan astam tósek-oryn ottegimen qamtamasyz etilgen, qazan aiynyń sońyna deiin qosymsha 9 myńnan astam tósek-oryn qamtamasyz etiledi.
Tórtinshi. Aýdandyq aýrýhanalardy qosymsha jabdyqtaý úshin 11 óńirde qolda bar 132 apparatqa qosymsha, otandyq óndiristiń 53 rentgen apparaty satyp alynady.
Jedel meditsinalyq kómek qyzmetin 2020 jyly 1 167 sanitarlyq avtokólikpen jabdyqtaý josparlanýda, onyń ishinen 360 avtokólik qosymsha satyp alynýda.
«Aýyl halqynyń meditsinalyq kómekke qoljetimdiligin arttyrý 100 jyljymaly meditsinalyq keshendi satyp alý esebinen júzege asyrylatyn bolady. Olardy aǵymdaǵy jyldyń qazannyń ortasyna deiingi merzimde óńirlerge jetkizý kútilýde», — dep túiindedi densaýlyq salasynyń basshysy.
