Búgin tikelei efirde QazCOVID-in vaktsinasyn alǵan QR Densaýlyq saqtaý ministri Aleksei Tsoiǵa «burynǵy Densaýlyq saqtaý ministri Eljan Birtanovty jumysqa alasyz ba?» degen saýal qoiyldy, dep habarlaidy "Ult aqparat".
«Sot Eljan Birtanovqa úiden shyǵýǵa jáne jumys isteýge ruqsat berdi. Ony Densaýlyq saqtaý ministrligine qabyldaisyz ba?», - dep surady tikelei efir barysynda «Habar 24» telearnasynyń tilshisi.
Bul saýalǵa Aleksei Tsoi: «Qazirgi ýaqytta biz de mundai aqparatty alyp otyrmyz. Bilýimizshe, qazirgi ýaqytta ol kommertsiialyq qurylymda jumys istep jatyr», - dep jaýap berdi.
Eske salsaq, burynǵy densaýlyq saqtaý ministri Eljan Birtanov 2020 jyldyń 3 qarashasynan, iaǵni bes aidan astam ýaqyttan beri úiqamaqta otyr. Ol asa iri mólsherde biýdjet qarajatyn ysyrap etti degen kúdikke ilindi.
Birtanov densaýlyq saqtaý ministrligin 2017 jyldan 2020 jylǵa deiin basqardy.
Sotta eks-ministr otbasyn asyraý úshin jumys isteýge múmkindik berýdi ótindi. Sáýir aiynyń sońynda sot úiqamaq merzimin 14 mamyrǵa deiin sozdy, alaida Birtanovqa saǵat 8:00-den 19:00-ge deiin syrtqa shyǵýǵa ruqsat berdi.
Sýdia Birtanovtyń asyraýynda bes balasy (onyń úsheýi kishkentai) jáne qart anasy bar ekenin eskerdi.
