Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin Tsifrlyq úkimet ofisinde qandai málimetter bazasy integratsiialanatynyn túsindirdi. Bul týraly ol Feisbýktaǵy paraqshasynda jazdy, dep habarlaidy "Ult aqparat".
«Tsifrlyq úkimet ofisindegi Sitýatsiialyq ortalyq barlyq aqparattyq bazanyń deregin oqi alady jáne aimaqtardyń bárimen etene jumys istep, jaǵdaidy nazarda ustaidy. Nátijesinde shynaiy aqparatqa jol ashylyp, qaǵazdaǵy jáne excel túrindegi esepter joiylady. Keide kúdikti esepter men dálelsiz derekterdiń bolatyny jasyryn emes. Máselen, biyl vaktsinalaý boiynsha osyndai jaǵdai boldy. Keibir iri kásiporyndar men ákimdikterdiń esebindegi kórsetkishterdi biz túrli bazalardaǵy málimettermen salystyryp, saraptama jasaǵanymyzda, sandar sáikes kelmei, «basqa aqiqatty» anyqtadyq. Qazir biz eldegi vaktsinalaý úrdisiniń ósimi boiynsha derekterdi kóre alamyz», - dep jazdy ministr.
Vedomstvo basshysy Tsifrlyq úkimet keńsesinde Sitýatsiialyq ortalyqtan basqa ulttyq analitikalyq ortalyq, tsifrlyq transformatsiia ortalyǵy jáne ulttyq jobalaý ofisi jumys isteitinin aitady.
«Ulttyq analitikalyq ortalyq matematikalyq úlgileýdi qoldanyp, bazadaǵy korreliatsiialardy izdestiredi, boljap, taldaý jasaidy.
Al tsifrlyq transformatsiia ortalyǵy haosty avtomattandyrýǵa tosqaýyl qoiady. Mysaly, buǵan deiin jeke turǵyn úi qurylysyna jer ýchaskesin alý úshin 11 qadam jasap, 88 kún kútý kerek bolsa, jańa úderis engizilgennen beri bul qyzmettiń nátijesine 3 qadam jasap, 8 kúnde qol jetkizýge bolady.
Ulttyq jobalaý ofisi barlyq ulttyq jobalardy baqylap, qajet bolǵan jaǵdaida túzetýler engizip, KPI oryndalmai jatqandyǵy týraly eskertý jiberedi. Mysaly, ulttyq jobadaǵy 1000 mektep salý bastamasyn jobalyq turǵyda basqaratyn ortaq júie bolady. Sol jerge jaýapty mamandar men organdar ózine qatysty derekterdi toltyryp otyrady. Biz qaǵazdaǵy esepter men hattardy joiǵymyz keledi. Endi júie tender jariialanǵannan bastap, barlyq jumystar barysyn qadaǵalap, táýekelderdi aldyn-ala anyqtaidy», - deidi Mýsin.
