2022 jyldyń birinshi toqsanynyń qorytyndysy boiynsha, tsifrlyq maining úshin biýdjetke 652 million teńge tústi, - dep habarlaidy "Ult aqparat" Qarjy ministrliginiń Memlekettik kirister komiteti baspasóz qyzmetine silteme jasap.
Elimizde 1 qańtardan bastap tsifrlyq maining úshin tólemaqy engizilgen. Ony tsifrlyq maining salasynda qyzmetin júzege asyratyn tulǵalar tutynylǵan elektr energiiasynyń naqty kólemine qarai tóleidi. Tólemaqy somasy toqsan saiyn esepti toqsannan keiingi aidyń 20-kúninen keshiktirmei tólenedi.
"Eske salaiyq, Salyq kodeksinde tsifrlyq maining úshin tólemaqy boiynsha salyq eseptiligin tapsyrý kózdelmegen. Tólemaqy somasy elektr energiiasynyń 1 kilovatt-saǵaty úshin 1 teńge mólsherinde esepteledi", - delingen habarlamada.
Aqparat boiynsha, tsifrlyq maining úshin tólemaqy elimizdiń 12 aimaǵynan túsken:
- Nur-Sultan qalasy - 277,3 million teńge;
- BQO - 143,1 million teńge;
- Aqtóbe oblysy - 48,9 million teńge;
- Qaraǵandy oblysy - 45,2 million teńge;
- Pavlodar oblysy - 36,9 million teńge;
- Almaty qalasy - 36,1 million teńge;
- Atyraý oblysy - 26,4 million teńge;
- ShQO - 24,3 million teńge;
- Almaty oblysy - 11,1 million teńge;
- Túrkistan oblysy - 2,2 million teńge;
- Jambyl oblysy - 685,1 myń teńge;
- Qostanai oblysy - 39,9 myń teńge.
Qalǵan aýmaqtardan tólemaqy túspegen. Negizinen, atalǵan tólemaqy respýblikalyq biýdjetke túsedi, sáikesinshe tólemaqy túsken aýmaq pen maining fermasynyń ornalasqan jeri sáikes kelmeýi múmkin ekeni de habarlandy.
Tólemaqynyń iri tóleýshileri mynalar:
- AISolutions JShS-i 93,2 million teńge somasymen;
- "LLÝ AGRO-ENERDJI" JShS-niń filialy 76,7 million teńge somasymen;
- BCD Company JShS-i 53,8 million teńge somasymen.
Osyǵan deiin, buqaralyq aqparat quraldarynda elektr qýatynyń qaýipsizdigin qamtamasyz etý maqsatynda mainingti júzege asyratyn kásiporyndardyń basym bóligi 2021 jyldyń qazanynan bastap elektr qýatynan ajyratylǵany týraly aqparat taraǵan bolatyn.
"Qazirgi ýaqytta QR Parlamentinde tsifrlyq maining úshin tólemaqy stavkasyn ulǵaitýdy kózdeitin zań jobasy qarastyrylyp jatyr", - MKK ókilderi.
