Foto: Akorda.kz
Qasym-Jomart Toqaev pen For Essozimna Gnassingbe BAQ ókilderi úshin brifing ótkizdi, dep habarlaidy "Ult aqparat" Aqordanyń baspasóz qyzmetine silteme jasap.
Ekijaqty kelissózderden keiin Memleket basshysy men Togo Prezidenti buqaralyq aqparat quraldarynyń ókilderi úshin birlesken málimdeme jasady.
Qasym-Jomart Toqaev, eń aldymen, shaqyrýyn qabyl alyp, elimizge resmi saparmen kelgeni úshin Prezident Gnassingbege rizashylyǵyn bildirdi. Memleket basshysynyń pikirinshe, Togo Prezidentiniń sapary eki el arasyndaǵy qatynastardy damytýǵa jol ashady. Qurlyqaralyq bailanystyń joǵary deńgeide ekenin bildiredi.
– Afrika elderimen yntymaqtastyqty nyǵaitý – Qazaqstannyń syrtqy saiasatyndaǵy negizgi baǵyttyń biri. Bizdiń memleketterimiz bir-birinen alysta jatyr. Soǵan qaramastan, biz Togomen tyǵyz qarym-qatynas jasaýǵa daiynbyz. Bul eldiń ózara tiimdi yqpaldastyq ornatýǵa umtylysyn tolyq qoldaimyz. Kelesi jyly Qazaqstan men Togo arasynda diplomatiialyq bailanys ornaǵanyna 10 jyl tolady. Osy kezeńde dostyq pen ózara qoldaýǵa negizdelgen yntymaqtastyq nyǵaia tústi. Qazir ony tyń qarqynmen damyta túsýge mol múmkindik bar. Jańa ǵana osy máseleni talqylap, mańyzdy kelisimderge qol jetkizdik. Munyń bári saiasi, saýda-ekonomikalyq, mádeni-gýmanitarlyq jáne basqa da saladaǵy bailanysty jandandyrýǵa yqpal etedi, – dedi Qasym-Jomart Toqaev.
Memleket basshysy Togo Prezidentimen aýyl sharýashylyǵy, jańa tehnologiia, qazba bailyqtardy birlese igerý, óndiris jáne investitsiia salalary boiynsha da kelissóz júrgizgenin aitty.
– Eki el úkimetterine taýar ainalymyn arttyrý úshin naqty sharalar qabyldaý jóninde tapsyrma berýge kelistik. Ásirese, Qazaqstannyń Togoǵa dándi daqyldy eksporttaý múmkindigi zor ekenine nazar aýdardyq. Elimizdiń bastamasymen Azyq-túlik qaýipsizdigi jónindegi islam uiymy qurylǵanyn bilesizder. Men Togony osy uiymǵa múshe bolýǵa, onyń áleýetin paidalanýǵa shaqyrdym, – dedi Prezident.
Memleket basshysy tabiǵi resýrstarǵa bai Qazaqstan men Togo elderi temir, fosfat, boksit jáne basqa da sirek kezdesetin mineral kenishterin barlaý, óndirý jáne igerý úshin birlese jumys isteý múmkindigine ie ekenine nazar aýdardy.
– Men Qazaqstan kásipkerleri Togonyń taý-ken óndirisin zertteýge daiyn ekenin atap óttim. Sonymen qatar eki eldiń kólik-logistika salasyndaǵy áriptestigi jan-jaqty talqylandy. Qazaqstanǵa Lome portynyń áleýetin qarastyrý boiynsha usynys aityldy. Bul teńiz ailaǵy qyzmet aýqymy boiynsha Batys Afrikada ekinshi oryn alady. Biz ózara tiimdi áriptestikti damytýǵa barynsha kúsh salýymyz kerek. Sondyqtan Togo kásipkerlerin kelesi jyly ótetin Astana halyqaralyq forýmyna qatysýǵa shaqyrdym. Olar forýmda Qazaqstannyń ekonomikalyq áleýetimen tanysa alady, – dedi Qasym-Jomart Toqaev.
Budan bólek, Prezident Astana men Lome arasynda mádeni-gýmanitarlyq yntymaqtastyq ornatý mańyzdy ekenine toqtaldy.
– Bul eki halyqtyń bir-birin jaqyn tanýyna múmkindik beredi. Osy rette Togo jastaryna Qazaqstannyń joǵary oqý oryndarynda bilim alýdy usyndym. Búgingi qatynastarymyzǵa tyń serpin berý úshin elderimizdiń Qurmetti konsýldaryn bekitýge kelistik. Bul kelisimder yntymaqtastyqty nyǵaita túseri sózsiz, – dedi Prezident.
Qasym-Jomart Toqaev eki eldiń halyqaralyq jáne aimaqtyq deńgeide tyǵyz qatynas ornatqanyn jáne kóptegen ózekti máselege qatysty ustanymdary uqsaitynyn atap ótti.
– Ásirese, jahandyq jáne óńirlik qurylymdar aiasynda yqpaldastyǵymyz oidaǵydai damyp keledi. Qazirgi geosaiasi jaǵdaida Birikken Ulttar Uiymy, Islam yntymaqtastyǵy uiymy, Afrika Odaǵy siiaqty qurylymdar arqyly ózara qoldaý kórsetý jáne konsýltatsiialar ótkizý asa mańyzdy, – dedi Memleket basshysy.
Sonymen qatar prezidentter jahandyq jáne aimaqtyq qaýipsizdik máseleleri týraly pikir almasty.
Qasym-Jomart Toqaev For Gnassingbeniń elimizge sapary, shyn máninde tarihi mańyzǵa ie ekenin jáne eki eldiń qarym-qatynasyn keńeitýge tyń serpin beretinin jetkizdi. Sondai-aq Ortalyq Aziia men Afrika arasyndaǵy yntymaqtastyqty odan ári damytýǵa yqpal etetinin aitty.
Óz kezeginde For Gnassingbe Togonyń Qazaqstanmen yntymaqtastyq ornatýǵa erekshe kóńil bólip otyrǵanyn jáne strategiialyq seriktestikti óńiraralyq qana emes, qurlyq deńgeiinde de damytýǵa múddeli ekenin atap ótti.
– 300 millionnan astam halqy bar Batys Afrika elderimen taýar ainalymyn jolǵa qoiǵan Togo qazaqstandyq investorlardyń qyzyǵýshylyǵyn týǵyzady dep oilaimyn. Aýyl sharýashylyǵy salasyndaǵy yntymaqtastyǵymyz damyp kele jatqany qýantady. Búginde sizdiń eldiń Togoǵa astyq jetkizý múmkindigi mol. Qazaqstan tsifrlandyrý salasynda aitarlyqtai jetistikke jetip otyr. Biz de óz elimizde tsifrlandyrý jobalaryn iske asyryp, osy baǵyttaǵy yntymaqtastyqty jolǵa qoiýǵa niettimiz. Bul turǵydan sizderden úirenerimiz kóp, – dedi Togo Prezidenti.
