Aqtaýda koronavirýs infektsiiasynyń taralýynyń aldyn alý jáne boldyrmaý jónindegi óńirlik shtabtyń kezekti otyrysy ótti, dep habarlaidy "Ult aqparat".
Epidemiologiialyq jaǵdai jaiynda baiandaǵan oblys ákiminiń orynbasary Gúlmira Qalmuratova aýrý juqtyrǵandar sanynyń kún saiyn kóbeiip jatqanyn aitty.
«Jaǵdai qiyn. Aýyr haldegi naýqastardyń sany ósýde. Bir táýlik ishinde 267 infektsiia juqtyrǵandar anyqtaldy. Sońǵy eki kúnde 24 adam qaitys boldy. Oblystyń 15 statsionarynda 944 adam emdelýde. Shilde aiynyń basynda shamamen 200 adam aýyrǵan bolsa, aidyń sońyna taman aýyrǵandar sany 5 ese ósti. Aýyrǵandardyń 99% -y koronavirýs infektsiiasyna qarsy ekpe almaǵandar ekenin atap ótken jón», - dedi Qalmuratova.
Oblystaǵy statsionarlarda 2 673 infektsiialyq jáne 138 reanimatsiialyq tósek-oryn bar. Infektsiialyq tósekter - 52%, reanimatsiialyq tósekter - 74% deiin tolǵan.
Búginde Mańǵystaýda 120 mobildi brigada jumys isteýde. Atalǵan brigadalardyń kómegimen 44 980 patsient úide dári-dármekpen qamtamasyz etildi, 72 myńǵa jýyq simptomsyz adamǵa qońyraý shalynyp, kómek kórsetildi. Qazirgi ýaqytta 5 969 azamat bailanysta bolǵandar retinde ambýlatoriialyq baqylaýǵa alynǵan.
Biraq bul áli de jetkiliksiz. Óńir basshysy alǵashqy meditsinalyq-sanitarlyq kómek jumysyn kúsheitýdi tapsyrdy.
«Aýrý anyqtaldy ma, tezdetip emdeý kerek. Keibir azamattardyń dárigerlerdiń baqylaýymen emdelýdi qalamaǵanyna qaramastan, aýyr jaǵdaiǵa jetkizbei, aýrýdy erte kezeńderde anyqtaý qajet. Iaǵni, oblystyń árbir turǵynymen bailanys ornatyp, jumys júrgizý kerek. Táýekel tobyndaǵy naýqastardy, ásirese qart adamdardy baqylaý qajet. Azamattarǵa ózin-ózi emdeýdiń ziiany týraly jetkizý mańyzdy», - dedi Trumov.
Oblys ákimi monitoring toptarynyń jumysyn da synǵa alyp, reid sharalaryn barynsha kúsheitýdi tapsyrdy. Bul jumystarǵa «Nur Otan» partiiasyn, máslihat depýtattaryn, politsiia qyzmetkerleri men barlyq jergilikti atqarýshy organdy jumyla kirisýge shaqyrdy.
«Adamdar toiǵa barmaǵannan ólmeidi, kerisinshe, toiǵa baryp, virýs juqtyrǵannan óledi. Adamdar sol jerde jinalyp, bir-birine aýrý juqtyrady. Bireýdiń ómirin saqtap qalýǵa úles qosýymyz qajet. Biz bul baǵytta birlese áreket etip, jumysty kúsheitýimiz kerek», - dep atap ótti aimaq basshysy.
Sarapshylar tek ujymdyq immýnitet jaǵdaidy nyǵaityp, halyqtyń densaýlyǵyna júktemeni aitarlyqtai tómendetedi dep birneshe ret aitqan bolatyn.
Búgingi tańda 95 086 óńir turǵyny I komponentpen, 55 333 adam II komponentpen egildi. Bul oblys halqynyń 30%-ynan sál artyq.
«Barlyq orynbasarlar men aýdan, qala ákimderine jumysty kúsheitýdi tapsyramyn. Halyqqa vaktsinatsiialaýdyń mańyzdylyǵyn túsindirý kerek. Ekpeniń kómegimen ǵana biz otbasymyzdy álemdi jailaǵan indetten qutqara alamyz», - dedi Trumov.
