QR Premer-Ministri Álihan Smaiylov Úkimet otyrysynda Eýropaǵa júk tasymaldaýdaǵy TRASEKA jobasynyń áleýeti týraly aitty, dep habarlaidy QazAqparat.
«Bizdiń aldymyzda turǵan aýqymdy mindettiń biri – 2025-shi jylǵa qarai tranzittik-tasymal kólemin 30 mln tonnaǵa deiin jetkizý. Elimizdi qýatty tranzittik habqa ainaldyrýdyń múmkindigi óte zor. Pandemiiaǵa jáne syrtqy saiasi jaǵdailardyń áserine qaramastan, tranzittik-tasymal kólemi ósip keledi. Biyl eki aidyń ózinde temirjol arqyly júk tasymalynyń kólemi 10%-ke, al tranzittik júkterdiń jalpy kólemi 20%-ke ósti.
Qytai men Eýropa arasyndaǵy konteinerlik tranzit kólemi de jyl saiyn artyp keledi. 2021-shi jyly bul kórsetkish 732 myń temirjol konteinerine deiin ulǵaidy», - degen Úkimet basshysy Qazaqstandy qýatty logistikalyq habqa ainaldyrý úshinm temirjol infraqurylymyn odan ári damytý kerek ekenin eske saldy.
«Geosaiasi jáne ekonomikalyq jaǵdai ýshyǵyp turǵan qazirgi kezeńde Eýropaǵa baǵyttalǵan tranzit kólemi men júk tasymalyn azaityp almaý úshin tez arada balama marshrýttar ashý isi qolǵa alyndy.
Qazirgi kezde júkterdi Ázerbaijan men Grýziia arqyly ótetin Transkaspii halyqaralyq transshekaralyq baǵyty men TRASEKA arqyly jiberý boiynsha jumystar júrip jatyr. Birlesken kásiporyndar qurý týraly kelisimderge qol jetkizildi. Bul otandyq júk tasymaldaýshylar úshin biryńǵai tarifterdi belgileýge múmkindik beredi.
Indýstriia ministrligine «Qazaqstan temir joly» ulttyq kompaniiasymen birge Transkaspii halyqaralyq transshekaralyq baǵytynyń turaqty jumysyn jáne qazaqstandyq biznes-qaýymdastyq úshin básekege qabiletti, biryńǵai tariftiń qabyldanýyn qamtamasyz etýdi tapsyramyn», - dedi Álihan Smaiylov.
