Nur-Sultan jáne Almaty qalalary aýmaǵynda karantin engizilýine bailanysty biyl 22 naýryz kúngi saǵat 00:00-den bastap Nur-Sultan jáne Almaty qalalaryna avtokólik quraldarymen jolaýshylar tasymaldaý toqtatylady. Bul týraly "Ult aqparat" QR Indýstriia jáne infraqurylymdyq damý ministrliginiń baspasóz qyzmetine silteme jasap habarlaidy.
«Avtokólikpen tranzittik jolaýshylar tasymaldaý atalǵan qalalar aýmaǵyna kirmesten júzege asyrylady. Sondai-aq, osy jyldyń 22 naýryzynda saǵat 00:00-den bastap Nur-Sultan jáne Almaty qalalaryna keletin, shyǵatyn jolaýshylar jáne qala mańy poiyzdarynyń júrýi toqtatylady. 22 naýryz kúni saǵat 00:00-den keiin Nur-Sultan jáne Almaty qalalaryndaǵy temirjol stansalary arqyly tranzitpen ótetin jolaýshylar jáne qalamańy poiyzdary jolaýshylardy túsirmegen kúide jáne eshkimdi mingizbei ótedi»,- delingen habarlamada.
Sonymen qatar, biyl 22 naýryz kúngi saǵat 00:00-den bastap Nur-Sultan jáne Almaty qalalaryndaǵy stansalarda jasaqtalatyn jáne olarǵa deiin baratyn jolaýshylar jáne qala mańy poiyzdarymen jolaýshylar tasymaldaý toqtatylady.
«Áýe kóligi boiynsha da biyl 22 naýryz kúngi saǵat 00:00-den bastap júk jáne halyqaralyq áýe reisterinen basqa Nur-Sultan jáne Almaty qalalarynyń áýejailaryna keletin jáne shyǵatyn jolaýshylar áýe reisteri toqtatylady.
Tótenshe jaǵdailar kezeńinde áýe jáne temirjol kóligimen saparlardan bas tartatyn jolaýshylarǵa bilet quny habarlasqan ýaqytyna qaramastan tolyq kólemde qaitarylatynyn aita ketý kerek», - deidi ministrliktiń baspasóz qyzmeti.
