Foto: stan.kz
Keiingi kezde áleýmettik jelilerde Janat Baqyt esimdi jýrnalistiń jasaǵan málimdemeleri jurtty shoshytyp, arty daýǵa ainalyp júr. Ol "Allanyń missiiasy aiaqtalǵanyn, endi ony Jaratýshy dep aitý keregin jáne ony qabyldaý qajet ekenin" aitqan edi. Al múftiiat onyń bul málimdemelerine ermeýge shaqyrǵan bolatyn. "Kóremiz" baǵdarlamasynda Janat Baqyttyń qurbysy Kámshat Bekjigitova qonaq bolyp, keiingi kezde jýrnalist jaqyndaryna ne aitqanyn áńgimeledi, - dep habarlaidy Massaget.kz portaly.
Jýrnalistiń Instagram-paraqshasyna 2 millionnan asa adam jazylǵan. Baǵdarlama málimetinshe, 2022 jylǵy jazǵa deiin onyń paraqshasy tynysh bolǵan, al 17 qyrkúiekte ol jańa dáýir týraly pikir aita bastaǵan, qazanda qostanailyq jeke kásipker Iýliia Gýntkodan regressivti gipnozdaýdyń tájiribesi men teoriiasynyń tolyq kýrsynan ótip, arnaiy sertifikat alǵanyn jariialaǵan. Janat munymen toqtamai, keiin Amira Álim esimdi regressologtan da tálim alǵan. Al aqpanda aqtóbelik Nurlybek Tólepovpen suhbattasqan.
Dombyra sheberi Aibat Káribai Janat Baqytty qoldaitynyn, Janat regressolog ekenin ári sýper sanamen jumys isteitinin aitqan. Al Janattyń qurbysy Kámshat Bekjigitova oǵan kómek kerek ekenin jaiyp saldy.
"Chatqa tańda sáresinde jazdyq. "Qyzdar, kim oiaý?" dep. "Men oiaýmyn ǵoi, bárin oiata almai jatyrmyn" dedi. Qyzdar "uiyqtaisyń ba?" dep surap jatamyz. "Joq, uiyqtamaimyn. Oiandym. Basqalardy oiata almai jatyrmyn ǵoi" deidi. "Janat, qai álemdesiń?" deimin. "Qýat-kózderimniń bári ashyq, aqparatty tikelei alamyn" deidi. Bolǵan áńgimeni jetkizý emes, mamandar túsinsin, qandai jaǵdai bolǵanyn bilsin degen (oi - esk.). Janat transtyń ishinde qalyp ketken siiaqty. Kómek berý kerek siiaqty. Men biletin Janat eshkimnen kómek alaiyn dep turǵan joq", - dep málimdedi ol.
Psihoterapevt Sanjar Tursynmetov adam úsh kún uiyqtamasa, galliýtsinatsiia bolatynyn aitty. Sondai-aq, oǵan kómek kerek ekenin jetkizdi.
"Estý arqyly bolatyn jáne kórý arqyly bolatyn galliýtsinatsiia degen uǵym bar. Bul kiside ekeýi de damyǵan siiaqty. Ol jerde bilim, deńgei eshteńege baǵynyshty emes. Jańa aǵasy (Janat Baqyttyń - esk.) pnevmoniiadan qaitys boldy dedik. Eń jaqyn adamy ólgen kezde "joǵaltý reaktsiiasy" bolady. Soǵan bailanysty qatty kúizelisten kelip shyǵatyn protsess bolýy múmkin", - dedi ol.
Kezinde Janat Baqyt suhbattasqan regressolog Nurlybek Tólepov te baǵdarlamaǵa kelgen. Onyń sózinshe, regressologiia - adamnyń problemasynyń sebebin ótken shaǵynan tabý. Mysaly, adamda qorqynysh bolsa, trans kúide onyń qaidan, qalai paida bolǵanyn anyqtaý. Onyń aitýynsha, Janat Baqyttyń sózinde burmalanǵan nárseler bar. Nurlybek Tólepov kanaldan aqparat alynatynyn, sol burmalanǵanyn, jyn-shaitannan da damyǵan tirshilik ieleri bar ekenin, solar kanaldardy ózgertetinin jetkizip, óziniń "jaratýshymen" bailanysa almaitynyn málimdedi.
"Trans kúige engizý arqyly júrgizemiz. Adam eki ret trans kúiinde bolady. Uiqyǵa ketip bara jatqan kezde jáne uiqydan oianǵan kezde. Eseńgiren sát - trans kúi", - dedi ol.
Janat Baqyttyń avtorlyq kýrsynan ótkender de barshylyq. Máselen, Aidana esimdi Janattyń aqtóbelik shákirtiniń ózi 90-ǵa jýyq adam qabyldaǵan. Ol túpsanamen jumys isteitinin aitady. Baǵdarlama málimetinshe, Janattyń abysyny Janar Jańabaiqyzy da osy ilimge shaqyryp júr. Sondai-aq, sińilisi Zarina Baqyt ta ony qoldaidy.
"Janat Baqytpen birge jańa dáýirge jol tarttyq", - degen shákirtteriniń biri Jelide.
Janat Baqyt Jelide málimdemeler jasaǵan kezde "Aqsarbaz" atty kitapqa súienetinin aityp otyrady. Baǵdarlama málimetinshe, orys tilinde jaryq kórgen kitapty 1994 jyly Edilhan Shaimerdenuly jazǵan.
"Qazaqtyń qiynshylyǵy - dinniń maǵynasyn bilmeý, tanymaý. Sondyqtan qalǵan ómirim - Táńir dinin jandandyrý. Óz dininen bas tartqan qazaq eshqashan jumaqqa jetpeidi. Ol - meniń antym", - degen ol Jelide taraǵan videolardyń birinde.
Sondai-aq, jýrnalist bul kitapty 1000 danamen shyǵartý úshin biraz qarjy bólgen eken.
Baǵdarlama málimetinshe, jýyrda áleýmettik jelide "Aqsarbazdyń Janat Baqytqa jaýaby" dep atalatyn aýdiojazba paida bolǵan. "Kóremizde" aýdiodaǵy daýys Edilhan Shaimerdenulyna uqsaityn adamdiki ekeni, ol Janatty sotqa bergisi keletini aitylǵan.
"Meniń oiymsha, ol - qylmysker. Ondai jumys isteitin bolsa, men ony sotqa beremin. Janatty jaldap otyrǵan ol emes, artynda úlken adamdar tur. Qaltaly adamdar. Olardyń oilary túsinikti. Aq Sarbaz jeńse, jer dúniede olarǵa óte qiyn bolady", - deidi aýdiodaǵy adam.
Sondai-aq, Edilhan Shaimerdenulynyń kómekshisi baǵdarlamaǵa osy jaitqa pikir bildirgen. Onda ol ustazynyń da, óziniń de bul jaǵdaiǵa qatyspaitynyn aitqan.
Qalqaman meshitiniń bas imamy, dintanýshy Rýslan Qambar jýrnalist Janat Baqytqa jyn kirgenin aitty.
"Birinshi kezekte biz ony (Janat Baqytty - esk.) kórgen joqpyz. Tek áleýmettik jeliden kórip jatyrmyz. Aýrý ekeni anyq bolyp tur. Tek psihologtar ainalysatyn aýrý desek, din týraly taqyryptardy ǵana qozǵap jatyr. Sondyqtan jyn aralasqan bolyp tur. Qazaqta barlyq ata-babamyz musylmanshylyqty dáriptegen. Janat - aýrý. Ol aýyryp jatyr qazir. Eń jaqyn týystary, jaqyndary kúshtep kómek berýdiń jolyn qarastyrý qajet. Ekinshi másele bar, Janattyń aityp jatqany taza esin bilip aityp jatqan sózder emes. Jyn tigenniń belgisi taza kórinip tur", - dep túiindedi ol.
Aita keteiik, jýrnalist Janat Baqyt buǵan deiin áleýmettik jelilerdegi paraqshalarynda "Allanyń missiiasy aiaqtalǵanyn, endi ony Jaratýshy dep aitý keregin jáne ony qabyldaý qajet ekenin" aitqan edi. Onyń bul málimdemeleri áleýmettik jelilerde qyzý talqylanyp, kópshiligi ún qatyp jatty.
