Senattyń jalpy otyrysynda QR Úkimetiniń jáne Respýblikalyq biýdjettiń atqarylýyn baqylaý jónindegi esep komitetiniń 2020 jylǵy respýblikalyq biýdjettiń atqarylýy týraly esepterin talqylaý kezinde senator Aqylbek Kúrishbaev sý tapshylyǵy máselesin kóterdi, dep habarlaidy "Ult aqparat".
«Jaqyn bolashaqta elimizdiń qaýipsizdigine áser etetin basty qaterdiń biri – sý tapshylyǵy bolýy múmkin. Dúniejúzilik bank sarapshylarynyń pikirinshe, 2030 jylǵa qarai Qazaqstandaǵy sý resýrstarynyń kólemi 90-nan 76 km³ deiin tómendeidi. Sonymen birge, sý sharýashylyǵy sektory infraqurylymynyń tozý kólemi 70%-dan asady. Nátijesinde, respýblikada sýarý júiesiniń paidaly áser koeffitsienti tek qana 0,45-0,55, iaǵni sýdyń 40 paiyzy paidalanylmai ysyrap bolyp jatyr», - dedi Kúrishbaev.
Onyń aitýynsha, qazirgi ýaqytta bizde aýyl sharýashylyǵy jerleriniń tek qana 4% zamanaýi tamshylatý tásilimen sýarylady, bul bar bolǵany 62 myń gektar.
«Biz jaqynda Túrkistan oblysynda Agrarlyq máseleler, tabiǵatty paidalaný jáne aýyldyq aýmaqtardy damytý komitetiniń kóshpeli otyrysyn ótkizdik. Qazirdiń ózinde óńirdiń barlyq jerinde sýaratyn sýdyń tapshylyǵy qatty baiqalýda. Halyqaralyq sarapshylar atap ótkendei, bizdiń basty problemamyz – sýdy josparlaý, baqylaý jáne paidalaný júiesiniń tiimsizdiginde. Iaǵni bizdiń elimizdegi sý daǵdarysy eń aldymen basqarýdaǵy daǵdarystyń saldarynan bolyp otyr. Birneshe mysal keltireiin. Sý resýrstary komitetiniń ózinde qyzmetkerlerdiń kópshiliginiń salalyq jumys tájiribesi joq, 38 adamnyń 18-i nemese tek 40%-y sý sharýashylyǵynyń mamandary. Jalpy «Qazsýshar» kásiporyn júiesinde qyzmetkerlerdiń tek jartysy ǵana tiisti kásibi bilimge ie, olardyń kóbisi zeinetke deiingi jasta. 761 ózen, 529 kól, 71 sý qoimasy ornalasqan Balqash-Alakól basseindik inspektsiiasynda bar bolǵany 21 maman jumys isteidi. Tórt oblystyń aýmaǵyn qamtityn Jaiyq-Kaspii basseindik inspektsiiasynda qyzmetkerlerdiń jalpy sany – 12 ǵana adam», - dedi senator.
Onyń paiymynsha, bul salany ózgertý úshin elimizge sý únimdeý jáne tsifrlyq tehnologiialardy meńgergen zamanaýi kadrlar kerek.
«Joǵary oqý oryndarynda sý mamandaryn daiarlaý sapasyn arttyrý, Jambyl gidromeliorativtik institýtyn qalpyna keltirý, Qazaqstanda sý problemalary boiynsha álemdegi jetekshi ýniversitettiń filialyn ashý, sý sharýashylyǵy ǴZI-dyń jumysyn jandandyrý, bilimdi arttyrý jáne mamandardy qaita daiarlaý jónindegi óńirlik ortalyqtardy qurý qajettiligi týraly kóptegen jyldar boiy aitylyp keledi. Biraq bul máseleler búginge deiin sheshilmedi. Sý obektileriniń kópshiliginde qazirge deiin gidrologiialyq beketter joq, sondyqtan biz elimizde qansha sý qory bar ekenin naqty bilmeimiz», - dedi depýtat.
«Transshekaralyq ózender týraly halyqaralyq kelissózderde biz ǵylymi negizdemelerimizdiń álsizdiginen jáne komissiia músheleriniń jii ózgerip otyrýynan utylyp jatamyz. Atap aitqanda, osy baǵytta biz qytailyq áriptesterimizden edáýir artta qalyp otyrmyz. Bul – bizdiń kórshilerimizben sý bólisý máselesinde álsiz tusymyzdyń biri. Osylaisha, elimizde strategiialyq mańyzy bar sý sharýashylyǵy salasyn kadrlyq jáne ǵylymi qamtamasyz etý máseleleri tolǵaǵy jetken suraqqa ainaldy», - dedi Kúrishbaev.
