AQSh prezidenttigine Respýblikalyq partiiadan úmitker Donald Tramp golf oinaǵan golf klýbynyń mańynda oq atyldy.
"Tramp atys bolǵan jerden birneshe júz metr qashyqta bolǵan, ol din-aman, biraq FTB bul oqiǵany "qastandyq áreketi bolýy múmkin" dep málimdedi. "Prezident Tramp aman", - dep habarlady onyń sailaýaldy naýqanynyń kommýnikatsiialar jónindegi direktory Stiven Chýng.
Oqiǵadan tórt saǵat ótken soń ótken baspasóz máslihatynda FTB, Qupiia qyzmet jáne jergilikti politsiia ókilderi Tramptyń golf klýbynyń janynda kólikpen qashpaq bolǵan adam ustalǵanyn jáne golf alańynyń janyndaǵy butalarda Kalashnikov avtomatynyń tastalǵanyn aitty.
Prezidentter men eks-prezidentterdi kúzetetin Qupiia qyzmet ókiliniń aitýynsha, olardyń qyzmetkeri butalardyń arasynan shyǵyp turǵan qarýdy kórip, áriptesterimen birge oq atqan. Sodan keiin kýáger butalardan qara tústi Nissan kóligine qarai júgirgen adamdy kórip, ol kólikke otyryp, qashyp ketkenin aitqan.
Politsiia sol adamdy kórshi okrýgtegi tasjolda ustap alǵan. Jergilikti politsiianyń sherifiniń aitýynsha, Qupiia qyzmet agentteriniń oqtary oǵan timegen. Butalardan optikalyq kózdeýishi bar AK-47 avtomaty, eki riýkzak jáne GoPro beinekamerasy tabyldy.
Kei jetekshi amerikalyq telearnalar men gazetter quqyq qorǵaý organdaryndaǵy aty-jónin atamaǵan derekkózderge silteme jasap, kúdiktiniń esimi Raian Ýesli Raýt (Ryan Wesley Routh), onyń jasy 58-de jáne Gavai turǵyny ekenin habarlady.
.jpg)