AQSh prezidenti Donald Tramp shtaby sailaý erekshe tartysty ótken, biraq sailaý nátijesi áli shyǵa qoimaǵan Michigan, Pensilvaniia jáne Djordjiia shtattarynda daýys sanaýdy toqtatý týraly sotqa aryz túsirdi. Tramp shtaby atalǵan úsh shtatta biýlletenderdi esepteý kezinde ashyqtyq bolmaǵanyn alǵa tartady.
“Biz búgin Michigan sotyna qajetti dárejede ashyqtyq bolǵanǵa deiin daýys sanaýdy toqtatý týraly aryz túsirdik” delingen 4 qarashada taraǵan shtab habarlamasynda.
Pensilvaniiada shtab qyzmetkerleri sailaý ýchaskesi ókilderin baqylaýshylardan daýys sanyn esepteýshilerge 8 metrden kem jaqyndamaýdy talap etip, sailaýdy baqylaýǵa kedergi jasady dep aiyptady. Olar bul shtatta da daýys sanaýdy toqtatýdy talap etip otyr.
Tramp jaqtastary sál kóbirek Djordjiia shtatynyń ońtústiginde shtab ókilderi joǵaryda aitylǵan aiyp negizinde sotqa ótinish túsiretinin aitqan.
Sailaý kezinde qandai da bir zańbuzýshylyq nemese sailaý ýchaskesi ókilderiniń daýys sanaý kezinde qandai da bir erejeni saqtamaǵany jaily dáleldiń joq bolǵanyna qaramastan sotqa aryz túsirilip otyr.
Osyǵan deiin Nevada shtatynda da daýys sanaý protsesi toqtatylǵan edi. Nevadanyń sailaý komissiiasy sailaý kúni – 3 qarashada poshtamen jiberilgen daýystardy, sodan soń aldaǵy aptada kelip túsetin basqa da biýlletenderdi sanaýǵa jáne daýys bergen kei azamattardyń aty-jónin naqtylaýdaǵy daýly máselelerdi sheshýge ýaqyt kerek ekenin aitqan.
Sońǵy málimet boiynsha, Baiden sailaýshylar alqasynyń 224 daýysyn, al Tramp 213 daýysyn alyp otyr. Jeńiske jetý úshin kandidat sailaýshylar alqasynyń keminde 270-iniń daýysyn alýy kerek. Ázirge alty shtat: Nevada, Soltústik Karolina, Pensilvaniia, Viskonsin, Djordjiia, Michiganda sailaý nátijesi belgisiz bolyp tur. Baidenge sailaýda jeńiske jetý úshin osy shtattardyń keminde úsheýinde, al Trampqa tórteýinde jeńiske jetý kerek.
Shtatta sanalǵan biýlletender sany 90 paiyzǵa jetip qaldy. Ulttyq sailaý júiesi saityndaǵy málimet boiynsha, Baiden ázirge sál ǵana alda keledi. Ol 49,33, al Tramp 48,69 paiyz daýys jinap tur.
