AQSh prezidenti Donald Tramp 20 tamyzda ótken brifingte Reseidi "Úlken jetilik" (G7) quramyna qaitarý "oryndy bolady" degen pikir aitty. Álemniń damyǵan elderin biriktiretin bul topta AQSh, Germaniia, Japoniia, Italiia, Kanada, Ulybritaniia jáne Frantsiia bar. Buryn G7 quramynda bolǵan Resei 2014 jyly Qyrym túbegin anneksiialaǵannan keiin onyń bul topqa músheligi toqtatylǵan.
"Meniń oiymsha, bul "Úlken segizdik" bolǵany jón, óitkeni biz talqylaityn máselelerdiń kóbi Reseige de qatysty" degen Tramp.
Tramp Reseidi top qataryna qaitarý qajettigi týraly buǵan deiin de birneshe ret aitqan. 2018 jyly Kanadada "úlken jetilik" sammiti óter aldynda Máskeýge jiynǵa qatysý týraly usynys jasaǵan. Ol kezde Kremldiń baspasóz hatshysy Dmitrii Peskov Reseidiń basqa formattaǵy kezdesýlerge yqylasty ekenin málimdegen. Alaida arada eki kún ótkende Resei prezidenti Vladimir Pýtin Máskeý bul jiyndy Reseide ótkizýge ázir ekenin aitqan bolatyn. AQSh-tyń belgili saiasatkerleri Tramptyń usynysyn synaǵan. Germaniia kantsleri Angela Merkel Kreml Ýkrainanyń shyǵysyndaǵy daǵdarysty retteýge qatysty mindettemelerin oryndamaǵandyqtan Reseidi sammit qataryna qaita qabyldaýǵa áli erte dep málimdegen.
Álemde ekonomikasy men qarjy kólemi boiynsha aldyńǵy oryndarda bolmasa da Resei 1997 jyly G7 tobyna sol kezdegi AQSh prezidenti Bill Klinton men Ulybritaniia premer-ministri Toni Blerdiń usynysy boiynsha qabyldanǵan. Mundai usynys Reseidi demokratiialyq institýttar men naryq ekonomikasyn damytýǵa yntalandyrý maqsatynda jasalǵan. Al 2014 jyly Máskeýdiń Qyrymdy anneksiialap alýyna bailanysty Batys elderi alǵashqy sanktsiialardyń biri retinde Reseidiń G8 tobyna músheligin toqtatýdy uiǵarǵan.
