اقش پرەزيدەنتٸ دونالد ترامپ 20 تامىزدا ٶتكەن بريفينگتە رەسەيدٸ "ٷلكەن جەتٸلٸك" (G7) قۇرامىنا قايتارۋ "ورىندى بولادى" دەگەن پٸكٸر ايتتى. ەلەمنٸڭ دامىعان ەلدەرٸن بٸرٸكتٸرەتٸن بۇل توپتا اقش, گەرمانييا, جاپونييا, يتالييا, كانادا, ۇلىبريتانييا جەنە فرانتسييا بار. بۇرىن G7 قۇرامىندا بولعان رەسەي 2014 جىلى قىرىم تٷبەگٸن اننەكسييالاعاننان كەيٸن ونىڭ بۇل توپقا مٷشەلٸگٸ توقتاتىلعان.
"مەنٸڭ ويىمشا, بۇل "ٷلكەن سەگٸزدٸك" بولعانى جٶن, ٶيتكەنٸ بٸز تالقىلايتىن مەسەلەلەردٸڭ كٶبٸ رەسەيگە دە قاتىستى" دەگەن ترامپ.
ترامپ رەسەيدٸ توپ قاتارىنا قايتارۋ قاجەتتٸگٸ تۋرالى بۇعان دەيٸن دە بٸرنەشە رەت ايتقان. 2018 جىلى كانادادا "ٷلكەن جەتٸلٸك" سامميتٸ ٶتەر الدىندا مەسكەۋگە جيىنعا قاتىسۋ تۋرالى ۇسىنىس جاساعان. ول كەزدە كرەملدٸڭ باسپاسٶز حاتشىسى دميتريي پەسكوۆ رەسەيدٸڭ باسقا فورماتتاعى كەزدەسۋلەرگە ىقىلاستى ەكەنٸن مەلٸمدەگەن. الايدا ارادا ەكٸ كٷن ٶتكەندە رەسەي پرەزيدەنتٸ ۆلاديمير پۋتين مەسكەۋ بۇل جيىندى رەسەيدە ٶتكٸزۋگە ەزٸر ەكەنٸن ايتقان بولاتىن. اقش-تىڭ بەلگٸلٸ ساياساتكەرلەرٸ ترامپتىڭ ۇسىنىسىن سىناعان. گەرمانييا كانتسلەرٸ انگەلا مەركەل كرەمل ۋكراينانىڭ شىعىسىنداعى داعدارىستى رەتتەۋگە قاتىستى مٸندەتتەمەلەرٸن ورىنداماعاندىقتان رەسەيدٸ سامميت قاتارىنا قايتا قابىلداۋعا ەلٸ ەرتە دەپ مەلٸمدەگەن.
ەلەمدە ەكونوميكاسى مەن قارجى كٶلەمٸ بويىنشا الدىڭعى ورىنداردا بولماسا دا رەسەي 1997 جىلى G7 توبىنا سول كەزدەگٸ اقش پرەزيدەنتٸ بيلل كلينتون مەن ۇلىبريتانييا پرەمەر-مينيسترٸ توني بلەردٸڭ ۇسىنىسى بويىنشا قابىلدانعان. مۇنداي ۇسىنىس رەسەيدٸ دەموكراتييالىق ينستيتۋتتار مەن نارىق ەكونوميكاسىن دامىتۋعا ىنتالاندىرۋ ماقساتىندا جاسالعان. ال 2014 جىلى مەسكەۋدٸڭ قىرىمدى اننەكسييالاپ الۋىنا بايلانىستى باتىس ەلدەرٸ العاشقى سانكتسييالاردىڭ بٸرٸ رەتٸندە رەسەيدٸڭ G8 توبىنا مٷشەلٸگٸن توقتاتۋدى ۇيعارعان.
