AQSh prezidenti Donald Tramp Parijde Resei prezidenti Vladimir Pýtin, Frantsiia prezidenti Emmanýel Makron, Germaniia kantsleri Angela Merkelm jáne basqa da álem elderiniń basshylarymen kezdesip, orta jáne qysqa qashyqtyqqa ushatyn zymyrandardy joiý jónindegi kelisim jaiyn talqylady. Bul týraly Aq úidiń baspasóz hatshysy Sara Sanders habarlady.
Kezdesýde sonymen qatar sanktsiialar, Siriiadaǵy jaǵdai, Soltústik Koreia máseleleri jáne basqa da aimaqtyq problemalar talqylandy. Kezdesý 11 qarasha kúni Parijde Birinshi dúniejúzilik soǵystyń aiaqtalǵanyna júz jyl tolýyna arnalǵan saltanatty shara aiasynda eki saǵatqa sozylǵan túski as kezinde bolǵan.
Buǵan deiin Vladimir Pýtin Donald Tramppen sóileskenin rastaǵan. Alaida, ol qandai taqyrypta sóileskenin aitpaǵan. Resei prezidentiniń baspasóz hatshysy Dmitrii Peskovtiń sózinshe, keleli kelissóz bolmaǵan, prezidentter tek túski as kezinde bir-birimen amandasyp, az-kem sóilesken.
Áýelde AQSh pen Resei prezidentteri Parijde eki jaqty kelissóz ótkizedi dep josparlanǵan edi. Biraq Frantsiia prezidenti "qazirgi saiasi máseleler tarih tragediiasyn eske alýǵa kedergi keltiredi dep sanaǵandyqtan" kezdesý ótpei qalǵan.
AQSh pen Resei prezidentteri osy aidyń sońynda Býenos-Aireste kezdesýi múmkin. Munda 30 qarasha men 1 jeltoqsan aralyǵynda "Úlken jiyrmalyq" (G20) elderi basshylarynyń sammiti ótedi. Alaida, Peskov Pýtin men Tramptyń Argentinada kezdesetini jóninde ázirge naqty kelisim jasalmaǵanyn, jaǵdai jii ózgerip jatqanyn aitady.
Osy kezge deiin Pýtin men Tramp eki ret qana - 2017 jyly jazda Gambýrgte G20 sammitinde jáne 2018 jyly shildede Helsinkide jeke kezdesken.
