AQSh prezidenti Donald Tramp Dúniejúzilik densaýlyq saqtaý uiymyn synap, qarjylandyrýdy toqtatatynyn málimdegennen keiin birqatar el men halyqaralyq uiym, qoǵamdyq uiym ókilderi DDSU-nyń koronavirýspen kúrestegi mańyzdy rólin atap ótti.
Buǵan deiin AQSh prezidenti DDSU indet kezinde óz mindetin durys atqarmady dep aiyptaǵan. Tramptyń pikirinshe, BUU qurylymyna qarasty uiym Qytaidan túsken habarlamalardy muqiiat zerttegen bolsa, indettiń taralýyna jol bermei, talai adamnyń ómirin saqtap qalar edi. Onyń oiynsha, uiym Qytai bergen málimetterge qatty senip, qatelesken. Tramp Vashington "basqarmanyń jibergen qatelikterin anyqtap bolǵansha" eki-úsh ai uiymdy qarjylandyrmaidy dep aitqan.
DDSU-nyń negizgi demeýshileriniń biri biznesmen, filantrop Bill Geits Tramp sheshimin ótkir synap, prezident áreketin qaýipti qadam dep atady.
Eýroodaqtyń syrtqy saiasat jónindegi joǵarǵy ókili Jozep Borrel qazir DDSU qoldaýǵa qatty zárý, mundai jaǵdaida Tramptyń áreketin aqtaýǵa bolmaidy dedi.
Ulybritaniia premer-ministri Boris Djonson keńsesi London densaýlyq saqtaý salasynda mańyzdy ról atqaratyn DDSU-ny qarjylandyrýdy toqtatpaidy dep málimdedi.
Qytai syrtqy ister ministrligi AQSh prezidentiniń sheshimi halyqaralyq áriptestikke nuqsan keltiredi dep aitty.
Avstraliia premer-ministri Skott Morrison Tramp málimdemesiniń mánin túsinetinin, biraq DDSU-nyń mańyzdy ról atqaratynyn joqqa shyǵara almaitynyn jetkizdi.
DDSU basshysy Tedros Gebreisýs "qazir bar kúsh-jiger indetti toqtatýǵa jumyldyrylǵan, sondyqtan qol qýsyryp otyrýǵa bolmaidy" dedi. BUU bas hatshysy Antoniý Gýterrish DDSU jumys istei berýi úshin oǵan resýrs bólinedi dep aitty.
Buǵan deiin AQSh-tyń ózinde Donald Trampty virýsty toqtatý úshin jetkilikti dárejede kúsh salmady dep birneshe ret synaǵan. AQSh virýs juqtyrǵandar sany boiynsha álemde alda tur. Munda 600 myńnan astam adamnan virýs tabylǵan. 26 myń adam qaitys bolǵan. Ókilder palatasynyń múshesi demokrat Eliot Engel "qazir prezident qoǵam nazaryn basqa jaqqa burý úshin barlyq amaldy qoldanyp jatyr" dep málimdegen. Al kóptegen respýblikashyldar, Tramp jaqtastary prezidenttiń DDSU-ǵa qatysty sheshimin "durys qadam" de baǵalady.
