AQSh prezidenti Donald Tramp koronavirýs Qytaidaǵy virýsologiia zerthanasynan tarady dep senimmen aitýǵa bolatyndai dálel baryn aitty. Buǵan deiin keibir ǵalymdar álemde júzdegen myń adamnyń ólimine sebep bolǵan qaýipti virýstyń jasandy paida bolýy týraly boljam jasaǵan edi. Tramp málimdemesi solardyń aitqanyna uqsas.
30 sáýirde Aq úidegi baspasóz máslihaty kezinde Tramp dálel baryn aitqanmen jai-japsaryna toqtalmady. "Muny aita almaimyn. Aitýǵa quqyǵym joq" dedi ol.
Tramp málimdemesi AQSh pen Qytai arasyndaǵy koronavirýstyń shyǵýyna bailanysty týyndaǵan salqyn qarym-qatynasty odan saiyn tereńdete túsýi múmkin. Degenmen prezident bul joly da koronavirýs qateliktiń kesirinen zerthana aýmaǵynan tarap, Qytai ony toqtata almaǵan bolýy múmkin degen boljamyn qaitalady.
AQSh prezidenti "koronavirýstyń paida bolýy týraly aqparattyń burmalanýyna Qytai basshysy Si Tszinpin jaýapty ma" degen suraqqa jaýap bermedi, biraq Qytai taýarlaryna jańadan baj salyǵy engiziledi dep ses kórsetti.
Tramp málimdemesinen buryn AQSh barlaý qyzmeti koronavirýs indeti qytai zerthanasynda ketken qatelikten taraýy múmkin degen boljamdy zerttep jatqanyn habarlaǵan. Barlaý qyzmeti ókilderi virýs "qoldan jasalmaǵan, genetikalyq turǵyda ózgermegen, zertteý osyny dáleldedi" dep málimdegen.
