AQSh prezidenti Donald Tramp Kongreske buǵan deiingi memleket basshysy Barak Obama ákimshiliginiń áreketin zertteýge shaqyrdy. Trampty ásirese 2016 jylǵy sailaý qarsańyndaǵy kezeń qyzyqtyrady, dep habarlady Associated Press.
AQSh ákimshiliginiń baspasóz hatshysy Shon Spaiserdiń jýrnalisterge habarlaýynsha, Tramp Kongrestiń barlaý jónindegi komitetin "Reseidiń AQSh-taǵy sailaýyna aralasýyna" qatysty júrgizilgen zertteýdi tekserýge, Obama ákimshiliginiń qyzmet babyn asyra paidalanǵan-paidalanbaǵanyn anyqtaýǵa shaqyrǵan. Spaiserdiń aitýynsha, zertteý aiaqtalǵansha osy taqyrypqa qatysty pikir aitylmaidy.
Buǵan deiin Tramp "sailaý qarsańyndaǵy telefon áńgimelerin tyńdaǵan" dep Obamany aiyptaǵan edi.
