AQSh prezidenti Donald Tramp eger Qytai koronavirýs indetiniń taraýyna sanaly túrde jol bergen bolsa, saldaryn tartady dep málimdedi.
18 sáýirde Aq úide ótken brifing kezinde Tramp AQSh koronavirýstyń qalai taralǵanyn zertteidi dedi. Onyń aitýynsha, eger Qytai kezdeisoq qatelik jibergen bolsa, ony kinálaýdyń qajeti joq. Al sanaly túrde jol bergeni anyqtalsa - "másele basqa" dedi. Tramp neni meńzegenin ashyq aitpady.
"Indetti Qytaidyń ózinde toqtatýǵa bolar edi, biraq olai bolǵan joq, endi qazir búkil álem zardap shegip jatyr" dedi Tramp.
Koronavirýs juqtyrǵandar men virýstan qaitys bolǵandar sany jaǵynan AQSh álemde alda tur. Munda sońǵy málimet boiynsha, 715 myńnan astam adam COVID-19 aýrýyna shaldyqqan.
Tramp senbi kúngi brifing kezinde Qytaidyń koronavirýs týraly resmi deregine senbeitinin de jetkizdi. Qytai biligi koronavirýstan 4 myńnan astam adam qaitys boldy dep málimdegen. AQSh-ta virýstan qaza bolǵandar 40 myńǵa jýyqtady.
- Birneshe kún buryn amerikalyq Fox News arnasy arnaiy qyzmet ókilderindegi qupiia derekózge súiene otyryp, koronavirýs infektsiiasy juqqan alǵashqy adam Ýhan qalasyndaǵy zerthanada jumys istegen, sol jerden virýs álemge taraǵan dep habarlaǵan bolatyn.
- Boljam boiynsha, Ýhandaǵy Qytai ǵylym akademiiasyna qarasty virýsologiia institýtynda istegen qyzmetkerge virýs zerthanada jarqanattan juqqan. Máselemen tanys qupiia derekkózine súiengen telearna virýs adamǵa syrtqy ortadan juqpaǵan degen tujyrymǵa dálel kóp ekenin aitady.
- Degenmen Fox News arnasy "virýs jasandy túrde shyǵarylǵan jáne qasaqana túrde taratyldy" degen tujyrym jasamaidy. Telearnanyń habarlaýynsha, AQSh biligi virýstyń paida bolýyn muqiiat zerttep jatyr.
- Buǵan deiin Qytaidyń syrtqy ister ministrliginiń ókili Chjao Litszian koronavirýs jasandy túrde shyǵaryldy degen boljamǵa dálel joǵyn aitqan.
