Dúisenbi keshkisin sóilegen AQSh prezidenti Donald Tramp Aýǵanstanda "Taliban" sodyrlaryn jeńýdi maqsat tutatyn AQSh-tyń urys strategiiasy týraly aitty.
Onyń paiymynsha, jeńis degen dushpanǵa oisyrata soqqy berý, radikaldy terrorlyq toptardy joiý, amerikalyqtarǵa qarsy keń aýqymdy terrorlyq shabýyldardyń aldyn alý jáne "Taliban" sodyrlarynyń kózin qurtý.
Munyń aldynda, iaǵni prezident sailaýy kezinde "trilliondap shyǵyn ákelip, nátije bermedi" dep AQSh-tyń Irak pen Aýǵanstandaǵy áskeri kompaniiasyn synaǵan Donald Tramp Aq úige kelgen soń jaǵdaimen tanysyp, «Qurama Shtattardyń Aýǵanstannan ketýi múmkin emes» ekenin túsingenin aitty. Ol "óitpegende Iraktaǵydai bos oryndaǵy vakkýmdy terrorister toltyrar edi" deidi.
- Biz Iraktaǵy qatelikti qaitalai almaimyz!,- dedi Tramp.
Munyń aldyndaǵy Obamaǵa qaraǵanda prezident Tramp Aýǵanstandaǵy jańa strategiiasyn egjei-tegjeili baiandai qoimady. Aýǵanstandaǵy AQSh áskeriniń mólsheri qanshaǵa kóbeietini, qai ýaqytqa deiin sol elde bolatyny jaiynda tis jarmady. Dese de AQSh kontingenti birneshe myń sarbazǵa kóbeietini ár jerde aitylyp qalyp júr.
Tramp "AQSh áskerileriniń qolyn endigi jerde Obama ákimshiligi talap etken arnaiy sanktsiialar bailamaitynyn, qolbasylar terrorlyq toptarǵa soqqy jasaýǵa bailanysty kez kelgen mańyzdy sheshimderdi óz betinshe qabyldai alatynyn" aitty.
- Biz qurlyqtaǵy áskerimizdiń mólsheri men onyń ketý ýaqyty týraly málimdeme jasamaimyz. Strategiiamyz Aýǵanstandaǵy jaǵdaiǵa qarai anyqtalady, - dedi ol.
AQSh tarihyndaǵy eń uzaq soǵys ekenin túsine otyryp Donald Tramp otandastaryna "AQSh Aýǵanstanda demokratiialyq qoǵam ornatýdy kózdemeitinin, maqsaty – "Taliban" sodyrlary men basqa da radikaldy terrorlyq toptarǵa qarsy aýǵan biligine qoldaý kórsetý ekenin" málimdedi. Ol óz ákimshiliginiń ekonomikalyq, diplomatiialyq jáne áskeri yqpal etý tetikteri bar naqty is-áreketter qamtylǵan strategiia qurastyrǵanyn aitty.
Donald Tramp Pákistanǵa eskertý jasap, «Kúnde bizdiń adamdardy óltirýge árekettenetin uiymdar dál osy Pákistannan pana tapty. Bul jaǵdai esh kidirmei ózgerýi kerek. Pákistannyń órkeniet, tártip pen beibitshilikke adaldyǵyn kórsetetin kezi keldi» dedi. Prezident Tramp Úndistandy Aýǵanstanǵa budan da kóp ekonomikalyq kómek kórsetýge shaqyrdy.
Tramp amerikalyqtardy halyqaralyq terrorizm qaýpi aldynda birigýge úgittedi.
