AQSh prezidenti Donald Tramp eger Baǵdat Vashingtonǵa qarsy "dushpandyq áreketke" baratyn bolsa, AQSh tarapynan eleýli sanktsiialarǵa kezigetinin eskertti. Bul málimdeme AQSh áskerin Iraktan shyǵarý týraly talapqa bailanysty aitylyp otyr.
"Onyń janynda Iranǵa qarsy sanktsiialar Baǵdatqa usaq-túiek bolyp kórinedi" dep málimdedi Tramp jýrnalisterge.
Onyń sózinshe, Irak AQSh salyp bergen áýe bazasy úshin tólem jasamaiynsha, AQSh áskeri Irak aýmaǵynan shyqpaidy. "Onyń qurylysyna milliardtaǵan dollar jumsaldy. Eger olar bizge sony tólemese, biz eshqaida ketpeimiz" dedi Tramp.
Buǵan deiin, 3 qańtarda AQSh prezidentiniń buiryǵymen júrgizilgen arnaiy operatsiia nátijesinde Baǵdat áýejaiynda Iran generaly Kasem Súleimani qaza tapqan. Osyǵan bailanysty Irak parlamenti shuǵyl ótkizgen otyrysynda qabyldaǵan qararda el aýmaǵynan barlyq sheteldik áskerdi alyp ketýge shaqyrǵan.
Irak parlamenti sonymen birge el aýmaǵynda, teńizde jáne áýe keńistiginde shetel áskeriniń qandai da bolmasyn kez kelgen belsendi is-áreketine tyiym salýǵa shaqyrǵan.
Qazirgi kezde Irakta AQSh-tyń bes myń sarbazy bar.
Irak úkimeti el aýmaǵynan AQSh áskerin shyǵarý sharalaryn ázirleýge kirisip ketken.
AQSh Memlekettik departamenti Irak úkimetin asyǵys sheshim qabyldaýǵa barmas buryn ábden oilanýǵa shaqyryp, "Islam memleketi" terrorlyq tobyna qarsy kúreste eki el arasyndaǵy berik yntymaqtastyqtyń mańyzdylyǵyn atap ótken. Germaniia, Frantsiia men Ulybritaniia da Irakty osy baǵyt boiynsha áriptestikti jalǵastyrýǵa shaqyrǵan.
Irannyń islam saqshylary korpýsynyń arnaiy elitalyq bólimi – "Quds kúshteriniń" qolbasshysy general Kasem Súleimani 3 qańtar, juma kúni tańerteń Baǵdat áýejaiyna ushyp kelgennen keiin AQSh-tyń áýe shabýylynan qaza tapqan. Bul operatsiia týraly buiryqty AQSh prezidenti Donald Tramp bergen. Osydan keiin Taiaý Shyǵystaǵy jaǵdai shielenise bastady dep habarlaidy Reuters. Iran generaldyń qazasy úshin Vashingtonnan kek qaitarýǵa ýáde etti. AQSh Taiaý Shyǵysqa qosymsha úsh myńǵa jýyq sarbaz jóneltý týraly sheshim qabyldady.
