Tramp ákimshiligi Resei men Batys arasyndaǵy ózara senimdi nyǵaitý maqsatynda osydan otyz jyl buryn qol qoiylǵan "Ashyq aspan" jaily kelisimnen shyǵýdy kózdeidi. Bul kelisim boiynsha, ár memleket óz aýmaǵynyń ústinen áýe keńistigi arqyly baqylaýǵa ruqsat beredi.
The Wall Street Journal (WSJ) jýrnaly kelisimnen shyǵýdy qyrǵi qabaq soǵystan keiin qurylǵan baqylaý tetikterinen bas tartýǵa baǵyttalǵan taǵy bir qadam dep baǵalaidy.
Biyl AQSh pen Resei orta jáne qysqa qashyqtyqta ushatyn zymyrandar týraly kelisimshartty toqtatqan. Strategiialyq shabýyldaýshy qarýlar (SNV-1) týraly 2021 jylǵa deiin kúshi bar kelisim máselesinde de belgisizdik baiqalǵan.
Resmi derekkózderge qaraǵanda "Ashyq aspan" týraly 1992 jyly jasalǵan kelisimnen shyǵý jónindegi qujatqa Tramp qazirdiń ózinde qol qoiǵanǵa uqsaidy. Ázirge Aq úi ony naqtylai túsetin suraqqa jaýap bergen joq. Ákimshiliktiń resmi ókilderiniń sózine qaraǵanda, pikirtalas ázirge jalǵasyp jatyr, "qazirgi prezident kezinde bári múmkin"
"Ashyq aspan" ideiasy 1955 jyly paida bolǵan edi. AQSh-tyń sol kezdegi prezidenti Dýait Eizenhaýer Sovet odaǵy men AQSh-tyń ústinen áýe keńistigi arqyly baqylaý missiiasyn júrgizýge shaqyrǵan bolatyn. Biraq ol kelisimshartqa ainalmaǵan.
Qyrǵi qabaq soǵys aiaqtalǵan qarsańda, 1990 jyldary AQSh prezidenti Djordj Býsh ákimshiligi burynǵy qarsylastarymen "Ashyq aspan" týraly kelisimdi talqylaýǵa kirisken. Bul kelisimge arasynda AQSh, Kanada, Eýropa elderi, Resei, Ýkraina bar, barlyǵy 34 memleket qosylǵan.
