Alǵashqyda egde jastaǵy kerekýlik tyńdarmanymen janjaldasyp, keiin Altynbek Qorazbaevty aldap ketken Tóreǵalidiń taǵy bir bylyǵy ashyldy. Bul joly Uly dala balasynyń ersi qylyǵyn sazger Qaldybek Qurmanáli aityp berdi. NUR.KZ tilshisine bergen ekskliýzivti suhbatynda kompozitor atyshýly ánshiden kóńili qalǵanyn aitty.
"Tóreǵalige meniń de ókpem bar. Mysaly, qazaqtyń uly kompozitory Shámshi Qaldaiaqovtyń qanshama kontsertine shaqyrǵanmyn. Ákesi de, ózi de ýáde bergen. Qatysamyn dep qoiady. Jarnamaǵa qosyp qoiasyń, atyn paidalanǵan siiaqty bolasyń. Biraq kontsertke kelmeidi. Soǵan qaraǵanda kóbirek aqsha tóleitin jerler bar shyǵar. Biraq uly tulǵalardyń keshine qatysamyn dep qoiǵannan keiin, ol qatysý kerek. Toidan da, aqshadan da qymbat dúnieler bar. Ol adamnyń ary, tazalyǵy", - deidi Qaldybek Qurmanáli.
Kontserttiń kúni belgilenip, afisha ilinse de, Tóreǵali kontsertke kelmei qalypty. Jarnamasy jer jarǵan keshke kelgen halyq "Uly dala balasynyń" joq ekenin bilgende, kompozitordy balaǵattap ketken kórinedi.
"Men Tóreǵalige Shámshi atamyzdyń "Bárinen de sen sulý" degen ánin bergenmin. Áiteýir kóńildi án ǵoi, toilarda shyrqap júrsinshi dep. Ákesimen de keliskenmin. Eki kontsertke de kelgen joq. Al kontsertke kelgender maǵan: "Tóreǵali Tóreáli kontsertke qatysady" - dep edińizder ǵoi. Qaida, nege kelmedi?" dep renish bildirdi. Búkil jurttyń kózinshe uiatqa qaldym", - deidi sazger.
Qaldybek Qurmanálini halyq aldynda qarabet qylǵan Tóreǵalidiń quityrqy áreketteri munymen shektelmegen. Ýádesinde turmaǵan Tóreáliniń uly jalǵan aqparat bergen bolyp shyqty.
"Bizge ótirik aitypty. "Men Qytaida júr edim" dep aitqan. Onda Qytaida júrse, baǵy jansyn dep tilek bildirdik. Sodan keiin Astanada kontsert ótkizip jatsaq, Astanada kórip qaldyq. "Ái, sen Qytaida ediń ǵoi..." - dep surasam: "Jo-joq, Qytaiǵa barmaityn bolyp qaldyq" - dep aldap tur. Men aittym: "Sen meni syilamai-aq qoi, sen Shámshini syilaý kereksiń" dedim", - deidi Qaldybek.
Ashýǵa býlyqqan sazger budan bylai Tóreǵali Tóreálini eshbir kontsertine shaqyrmaityn bolyp sheshipti. Soǵan qaraǵanda atyshýly ánshini qazaq óneriniń ókilderi de syilaýdan qalǵan syńaily.
"Adamnyń abyroiy osylai joǵalady. Qasyqtap jinaǵan abyroiyn shelektep tógetin adamdar bar. Sondyqtan men Tóreǵalidi eshqashan qoldamaimyn. Tóreǵali Tóreálisiz de kontsert ótedi ǵoi. Ol týylmai turǵanda da qazaq óneri toqtap qalǵan joq. Qazaq óneri ar-namysy, uiaty bar, úlkenderdi syilaityn adamdardan turady. Al úlkendi syilamasa ony endi kim syilaidy?! Eshkim syilamaidy. Ýáde berdiń be, sózińde turý kerek. Ýáde – qudai sózi", - deidi kompozitor.
Eske salsaq, osydan birneshe kún buryn belgili sazger Altynbek Qorazbaev Tóreǵali Tóreáliniń ózin laqtyryp ketkenin aitqan bolatyn.
