QR Memlekettik hatshysy Qyrymbek Kósherbaev ǵuryptyq rásimderdi zańmen retteýmen ainalysatyn jumys tobyn qurýdy usyndy, dep habarlaidy QazAqparat.
Onyń aitýynsha, búgingidei kúrdeli kezeńde halyq bolyp keńesip, jurt bolyp bátýalasatyn keleli máseleler az emes.
«Bizdiń qoǵamymyz jańarǵan soń ustanatyn salt-dástúrlerimiz de ózgerýge tiis. Eldi keri tartatyn jaǵymsyz qasietterden tezdetip arylýymyz kerek. Mysaly, qazaqtyń toiy esepsiz shyǵynnyń emes, shynaiy shattyqtyń kórinisine ainalýǵa tiis. Barymyzdy shashyp-tógip, qaryzdanyp toi men basqa jiyn ótkizetin ádetten arylýymyz qajet. Ysyrapshyldyq pen dańǵazalyq qoǵamnyń da, adamnyń da abyroiyn tógedi. Sondyqtan keibir máselelerdi zańdy jolmen retteýdiń kezi keldi dep oilaimyn. Al jaýapsyzdyq pen nemquraidylyq búkil eldi qasiretke ushyratady», - dedi ol.
Onyń aitýynsha, bekitilgen sanitarlyq talaptardy buzyp, jasyryn toi jasap, qudalyq ótkizip, as berip jatqan oqiǵalardyń arty orny tolmas ókinishke ákep soqtyrýda.
«Kórshi elderde týǵannan ólgenge deiingi oryndalatyn salt-dástúr, (toi, as, janaza t.b) ádet-ǵuryp rásimderin zańmen rettep qoiǵandyqtan halyq qoiylǵan talapty qalypty túrde qabyldaidy. Biz ne isteýimiz kerek? Aldaǵy ýaqytta kópshilikpen keńese kele, biz de kórshi elderdiń úlgisi boiynsha ǵuryptyq rásimderdi zańmen retteý sharalaryn qolǵa alatyn ýaqyt jetti dep oilaimyz. Sondyqtan, dúniejúzilik pandemiia tusynda jáne odan keiingi kezeńde ǵuryptyq rásimderdi zańmen retteý sharalary boiynsha ziialy qaýym men qoǵam qairatkerleri, osy salamen ainalysatyn zańgerlerden quralǵan jumys tobyn qurýdy usynamyz», - dedi Memlekettik hatshy.
Bul top kórshi elderdiń tájiribesin zerttep, halyqtyń oi-pikirin zerdelep jáne qajet bolǵan jaǵdaida tiisti normativtik-quqyqtyq aktiniń jobasyn ázirleýmen ainalysatyn bolady.
