31 tamyz kúni uiymdastyrylǵan Tour of Almaty-2019 velododasy aiaqtaldy. Eki kúnge jalǵasatyn jarys úshinshi jyl qatarynan jalǵasyn tapty. Birinshi kezeń «Indýstrialdy parkte» ótip, 118 shaqyrymǵa sozyldy. Alǵashqy kezeń jeńimpazy – CCC Development Team komandasynyń shabandozy Patrik Shtoh.
Ekinshi taýly kezeńde shabandozdar 160 shaqyrym júrdi. Bul kezeń Tour of Almaty jarysynyń bet-beinesine ainaldy. «Halyq Arenadan» bastaý alǵan ekinshi kezeń Shyǵys ainalma joly arqyly ótip, ál-Farabi dańǵylyna keldi. Sosyn Mustafin kóshesiniń mańyndaǵy ainalma joldan Halilin kóshesindegi kúrmeýge jetti. 4,5 ainalymnan soń peloton Tuńǵysh Prezident saiabaǵynan «Medeý» muz aidynyna qarai finaldyq bólimge ulasty.
Jarys barysynda shabandozdar birneshe márte shabýyldar jasap, qyzý básekege tústi. Sonyń eń mańyzdy tusy márege 2 shaqyrym qalǵanda oryn aldy. Astana Pro Team shabandozy Iýrii Natarov, Gazprom-RusVelo shabandozy Nikolai Cherkasov, Amore&Vita-Prodir komandasynyń ókili Danilo Chelano - úsheýi negizgi toptan sýyrylyp alǵa shyqty. Osy úshtik júldelerdi sarapqa saldy.
Chelano ekinshi kezeńniń jeńimpazy atansa (3:51:57), Cherkasov – ekinshi keldi (+0,01). Al Natarov úshinshi kelgenimen (+0,04) bir kún burynǵy jappai sprinttegi ýaqytynyń arqasynda jalpy jarystyń jeńimpazy atandy. Otandasymyz Gazprom-RusVelo komandasynyń myqtysy Aleksandr Vlasovtan 26 sekýndqa, al Chelanodan 38 sekýndqa basym tústi.
