QR Tótenshe jaǵdailar ministrligi Tótenshe jaǵdailardyń aldyn alý departamentiniń bastyǵy Rústembek Ámrin sý tasqyny qaýpi bar óńirlerdi atady, dep habarlaidy QazAqparat.
«Qardaǵy sý qorynyń mólsherin, topyraqtyń kúzgi ylǵaldanýyn, topyraqtyń qatý tereńdigin taldai otyryp, sondai-aq qar astynda muz qabyǵynyń bolýyn eskerip, sý tasqyny qaýpi bar aimaqtar anyqtaldy. Táýekeli joǵary óńirlerge SQO, ShQO, Aqmola, Qaraǵandy jáne Qostanai oblystary jatady. Ortasha qaýipti aimaqtarǵa: BQO, Aqtóbe, Pavlodar, Almaty, Jambyl jáne Túrkistan oblystary kiredi», - dedi ol Ortalyq kommýnikatsiialar qyzmetindegi baspasóz máslihatynda.
Onyń dereginshe, qazirgi ýaqytta qar jinalý protsesi jalǵasýda jáne sý tasqynyna túpkilikti boljam Qazgidromet tarapynan 1 naýryzdaǵy jaǵdai boiynsha daiyndalyp jatyr.
«Sońǵy bes jylda sý tasqynynan elimizdiń on óńirindegi 165 eldi meken zardap shekti», - dedi departamet bastyǵy.
