Búgin Almaty oblysynyń Qarasai mamandandyrylǵan aýdanaralyq ákimshilik soty tótenshe jaǵdai rejimin buzǵany úshin «Bentley» markili avtokóliginiń júrgizýshisi men onyń jolaýshysyn ákimshilik jaýapkershilikke tartý týraly sheshim shyǵardy, dep habarlaidy "Ult aqparat".
Esterińizge salsaq, áleýmettik jelide júrgizýshi, politsiia qyzmetkerleriniń talaptaryna baǵynbai, qorshaý beketin shapshań jyldamdyqpen ótkeni týraly video keń taraǵan.
Jelide taralǵan videony avtordyń ózi kólik salonynan túsirgen.
Qarasai mamandandyrylǵan aýdanaralyq ákimshilik soty baspasóz qyzmetiniń málimetinshe, sot otyrysynda «Bentley» markili avtokóliginiń 35 jastaǵy júrgizýshisi D. men 30 jastaǵy jolaýshy A. 2020 jyldyń 10 sáýirinde saǵat 16:00 shamasynda Almaty-Jandosov tasjoly boiymen Jańaturmys aýylynyń qiylysqan jerindegi sanitarlyq beketinen shapshań jyldamdyqpen óte shyqqan. Olardyń politsiia qyzmetkerleriniń talaptaryn eskermegeni de anyqtalǵan.
Sotta quqyqbuzýshylar óz kinásyn tolyqtai moiyndap, jasaǵan is-áreketterine ókinetindikterin bildirdi.
2020 jyldyń 15 sáýirinde sot olardy Qazaqstan Respýblikasynyń Ákimshilik quqyqbuzýshylyqtar týraly Kodeksiniń 476-baby 1-tarmaǵynda kózdelgen ákimshilik quqyqbuzýshylyqty jasaǵandary úshin kináli dep tanyp, 15 táýlik ákimshilik qamaqqa alý jazasyn taǵaiyndady.
Qaýly zańdy kúshine engen joq.
Aita ketken jón, Almaty oblysynyń bas memlekettik sanitarlyq dárigeriniń qaýlysy boiynsha, turǵyndar arasynda koronovirýs infektsiiasyn juqtyrý jaǵdaiyn keń taratpaý maqsatynda, Qazaqstan Respýblikasy Prezidentiniń «QR aýmaǵyna tótenshe jaǵdai engizý týraly» Jarlyǵyna sáikes oblys aýmaǵynda shekteý sharalary kúsheitilgen bolatyn.
Osyǵan bailanysty, basqa oblyspen qiylysqan shekaralarda oblys aýmaǵyna kirýge shekteý qoiý úshin qorshaý beketteri qoiylǵan.
Biraq, barlyq shekteýlerge qaramastan, jekelegen azamattar tótenshe jaǵdai rejimin saqtamai otyr.
