Qazaqstanda kásipkerlik sýbektilerin múlik salyǵynan bosatý máselesi qarastyrylyp jatyr. Bul týraly «Atameken» UKP kásipkerlerdi quqyqtyq qorǵaý departamentiniń direktory Shyńǵys Temir aityp berdi, dep habarlaidy QazAqparat tilshisi.
«Jalǵa berýshi jaldaý aqysyn talap etkende jalǵa alýshy ony tólei almaidy. Qazir onyń qyzmet túrine tyiym salynsa, onda bul jaǵdaidan shyǵýdyń birneshe joly bar. Eger osy merzimdegi jaldaý aqysyn toqtatýǵa kelise almasańyz, tólemdi keiinge qaldyrý ádisin qarastyra alasyz», - dedi Sh. Temir onlain-brifingte.
Sonymen birge, «Atameken» UKP Úkimetpen birlesip, jalǵa berýshiler úshin qarjylyq mindettemelerdiń keibir túrlerin jeńildetý nusqalaryn qarastyrýda.
«Jalǵa berý de biznes bolyp sanalady, jalǵa berýshiniń nesie jáne salyq syndy óz mindettemeleri bar. Osyǵan bailanysty biz biznesti salyqtan bosatýdy usynyp otyrmyz. Iaǵni, salyq tóleýshilerdiń belgili bir sanatyn belgili bir salyq túrlerinen bosatýdy usynamyz. Qazirgi ýaqytta kásipkerlik sýbektilerin, kásipkerler men zańdy tulǵalardy múlik salyǵyn tóleýden bosatý máselesi pysyqtalýda. Osylaisha qiyndyqqa tap bolǵan kásipkerlerge kómekteskimiz keledi», - dedi Shyńǵys Temir.
