QR Ulttyq ekonomika ministri Rýslan Dálenov Májilistiń jalpy otyrysynda júrgizýshi kýáliginiń jaramdylyq merzimi ótip ketken azamattarǵa qandai quqyq beriletindigin aitty, dep habarlaidy QazAqparat.
«Qujatynyń jaramdylyq merzimi ótken azamattarǵa tótenshe jaǵdai rejim kezinde ony jańartý múmkin emestigine bailanysty mundai qujatty paidalaný quqyǵyn berý qajet dep sanaimyn. Qazirgi ýaqytta Ishki ister ministrligi óz quzyreti aiasynda bul máseleni sheshý úshin qaýly jobasyn ázirlep jatyr. Osylaisha, tótenshe jaǵdai rejimi kezinde jaramdylyq merzimi ótken qujattardy azamattarymyzǵa paidalaný quqyǵy berilmek», - dedi ol.
Al Ishki ister ministriniń orynbasary Iýrii Ilin ministrdiń buiryǵymen kólik júrgizýge ruqsat beretin qujatynyń jaramdylyq merzimi ótip ketken azamattardy ákimshilik jaýapkershilikke tartpaý týraly tapsyrma berilgendigin aitady.
«Jeke kýálikke qatysty aitar bolsaq, qazir Memleket basshysynyń atyna usynys ázirlendi. Bul tótenshe jaǵdai rejiminiń qoldanys kezeńinde atalǵan normany Prezident Jarlyǵymen uzartý úshin qajet. Ondai qujattar tizimi óte kóp», - dedi ministr orynbasary.
Osy oraida Májilis tóraǵasy Nurlan Nyǵmatýlin tótenshe jaǵdai kezinde 99,5 myń jeke kýáliktiń, 68 myń júrgizýshi kýáliginiń jaramdylyq merziminiń ótip ketkendigin aitty.
«Buǵan qosa mamyrda 90 myń jeke kýáliktiń jaramdylyq merzimi aiaqtalady eken. Munyń barlyǵy tótenshe jaǵdai kezeńinde oryn alyp otyr ma?», - dep surady ol Iýrii Ilinnen.
Ishki ister ministrinen naqtylanǵan jaýap alǵannan keiin Májilis tóraǵasy elimizde tótenshe jaǵdai rejimi engizilgen jaǵdaida adamdar merzimi ótken qujattarymen ne isteý kerektigin túsinýi úshin mundai normanyń qajet ekendigin basa aitty.
