«Atameken» ulttyq kásipkerler palatasynyń basqarma tóraǵasy Abylai Myrzahmetov Tótenshe jaǵdai kezinde tabysy kóbeigen salalar týraly pikir bildirdi, dep habarlaidy QazAqparat.
«Onlain jetkizý qyzmetteriniń ainalymy 3-5 esege deiin artty. Tótenshe jaǵdai kezinde bul sala keńinen damydy. Árine, qoimalardyń jetispeýi syndy kemshilikter de anyqtaldy. Azyq-túlik jáne agrarlyq sektordaǵy tabys 2,6 paiyzǵa artty. Meditsina salasynda da ósim baiqalady, óitkeni halyq meditsinalyq maskalar men túrli preparattardy satyp aldy», - dedi A. Myrzahmetov onlain bergen suhbatynda.
Onyń aitýynsha, TJ kezeńin qosqanda, memlekettik satyp alýlar biýdjeti 4,7 trln teńge bolǵan. Onyń 3,9 trln teńgesi qurylys salasyna bólingen.
«3,9 trln teńge nemese biýdjettiń 85 paiyzy qurylys salasyna bólingen. Aýqymdy qarajat bólingendikten, bul salalada da ilgerileý baiqalýy tiis. Bes kúnnen beri tenderler jeńildetilgen túrde ótip jatyr. Olardy otandyq kásiporyndardyń alǵany mańyzdy. Ázirge 2 trln teńgege tenderler ótkizildi. Osy protsesti muqiiat qadaǵalap, qarajattyń qaida ketip jatqanyn baqylaýǵa shaqyramyn», - dedi spiker.
