«Damý» qory tártipsizdikterden zardap shekken shaǵyn jáne orta biznes nysandaryna qandai kómek usyna alatynyn málim etti, dep habarlaidy QazAqparat.
Prezident Qasym-Jomart Toqaevtyń 6 qańtardaǵy tapsyrmasy boiynsha, QR Qarjy naryǵyn retteý jáne damytý agenttigi men Ulttyq ekonomika ministrligi tártipsizdikterden zardap shekken shaǵyn jáne orta biznes sýbektilerine memlekettik qoldaý kórsetý boiynsha sharalar ázirledi.
Sonyń aiasynda Tótenshe jaǵdai kezeńinde zardap shekken jeke jáne zańdy tulǵalardyń qaryz tólemderin keiinge qaldyrý tártibi bekitilip otyr.
Qujat QR Qarjy naryǵyn retteý jáne damytý agenttigi tóraǵasynyń 2022 jyldyń 10 qańtaryndaǵy №8 buiryǵymen bekitilgen.
Osy qujatqa sáikes, «Damý» kásipkerlikti damytý qory tótenshe jaǵdai kezinde zardap shekken shaǵyn jáne orta biznes nysandarynyń memlekettik baǵdarlamalar aiasyndaǵy jobalar boiynsha alǵan nesielerin sýbsidiialaý jáne kepildik berý quraldaryn jeńildetilgen tártippen bir jumys kúni ishinde qaita qurylymdaýdy maquldaýǵa daiyn ekenin habarlaidy.
«Biznestiń jol kartasy-2025» memlekettik baǵdarlamasy aiasynda sýbsidiialaý jáne kepildik berý quraldary boiynsha jobalardy qaita qurylymdaý kásipkerlerdiń qarjy-sharýashylyq qyzmetin taldaýsyz bir jumys kúni ishinde maquldaýdan ótedi.
Osy ýaqyt ishinde ótinim qujattary jinalyp, qaita qurylymdaý sharttary maquldanyp, bankterge hat jiberiledi.
«20 mln teńgege deiingi shaǵyn nesielerdiń qujattary kredittiń merzimin uzartý qajet bolsa jáne kepildik merzimin uzartý kerek bolsa ǵana qordyń maquldaýyna jiberiledi», - delingen qordyń baspasóz qyzmeti usynǵan túsindirmede.
«Damý» qorynyń mamandary mikro, shaǵyn jáne orta bizneske arnalǵan 2022 jylǵy sýbsidiialaý jáne kepildik berý quraldary jýyq arada tolyq kólemde jalǵasatynyn aityp otyr.
Resmi derekke súiensek, 2021 jyly qor 57,7 myń jobaǵa 2,175 trln teńge nesie bergen. Onyń ishinde 13,4 myń mikrokásipkerlik jobaǵa 75,4 mlrd teńge nesie jumsalǵan.
Sýbsidiiaǵa kelsek, 32,3 myń jobaǵa 1 trln 598 mlrd teńge sýbsidiia tólengen.
Onyń ishinde COVID-19 pandemiiasy kezinde neǵurlym zardap shekken kásipkerlerdi qoldaý sheńberinde 11 myń jobanyń 421,7 mlrd teńge nesiesi sýbsidiialanǵan.
17,3 myń joba boiynsha 366 mlrd teńgeniń nesiesine kepildik berildi.
8,4 myń jobaǵa jeńildetilgen qarjylandyrý qarajaty esebinen 211 mlrd teńge nesie bólindi.
«Qordyń óńirlik filialdaryndaǵy menedjerler ekinshi deńgeidegi bankter men qarjy uiymdarynda nesie rámidep jatqan kásipkerlerge online.damu.kz jáne egov.kz. elektrondyq portaldary arqyly keshendi qoldaý kórsetedi. Kásipkerler óz ótinimderin egov.kz jáne online.damu.kz portaldary arqyly onlain rejimde jibere alady. Sondai-aq www.damu.kz, www.online.damu.kz saittary arqyly nemese 1408 biryńǵai Call-ortalyǵy arqyly aqparat beriledi (qońyraý shalý tegin)», - dep jazady qordyń bapsasóz qyzmeti.
