Foto: canva.com
Balalar ombýdsmeni Dinara Zakieva Shymkentte Balalar quqyqtary jónindegi ýákilimen birlese jumys istei kele birneshe zańbuzýshylyqtyń beti ashylǵanyn jazdy. Balalardyń quqyqtaryn qorǵaý júiesiniń tiimdiligin arttyrý úshin qandai qadamdar jasalyp jatqanyn aitty.
"Aqpan aiynan beri biz QR IIM, Bas prokýratýra jáne Shymkent qalasynyń Balalar quqyqtary jónindegi ýákilimen birlese jumys istep kelemiz.Bul oqiǵada biraz sumdyq bar, sonyń biri – balalardyń úlkeniniń sózinshe, asyrap alýshylar balalarǵa zár ishkizip, nájispen tamaqtandyrǵan. Is sotqa jiberildi. Sondai-aq, olar balaǵa tiesili aqshany eshkiler satyp alýǵa jumsap, balaǵa baqqyzyp qoiǵandary týraly derek bólek tergelýde.
Bul jaǵdaida balalardyń úlkeniniń denesindegi kógergen jerlerdi kórgen mektep muǵalimderi jáne qamqorshylyq organdaryna suraq kóp. Olarǵa qatysty da qylmystyq ister qozǵaldy, tergeý júrip jatyr. Bul keiingi birneshe aida bala asyrap alǵan otbasylardyń tarapynan bolǵan azaptaý anyqtalǵan 4-shi jait", - dep jazdy ol.
Mektep muǵalimderi balalardyń denesindegi kógergen jerlerdi kórgende, qamqorshylyq organdaryna suraqtar týyndady. Osyǵan qatysty da qylmystyq ister qozǵaldy.
Qabyldanǵan sharalar
Aqpan aiynyń sońynda Prezident Ákimshiliginde ákimdiktermen kezdesý ótti. Nátijesinde:
1. Naýryz aiynan bastap reidter: Barlyq asyrap alýshy otbasylardy tekserý bastaldy. Aiaqtalý merzimi - 1 shilde.
2. Zańǵa ózgerister engizildi: Memlekettik jáne qamqorshylyq organdarǵa tekserý júrgizý boiynsha ózgerister qabyldandy. Buryn qamqorshylyq organdardy turaqty tekserý júrgizilmegen.
3. Qamqorshylyq organdarynyń qyzmetkerleriniń tapshylyǵyn sheshý: Qamqorshylyq organdarynyń qyzmetkerleriniń quzyreti men sanyn bekitý týraly túzetýler daiyndadyq. Mysaly, Shymkentte 485 myń balaǵa 5 ǵana qamqorshylyq qyzmetkeri bar. Bul sandy 90-ǵa deiin arttyrý kerek.
Mańyzdy máseleler
- Qamqorshylyq qyzmetkerleriniń júktemesi: Qazir bir qyzmetkerge 90 myń bala keledi. Halyqaralyq standart boiynsha bul san 5 myń bala bolýy kerek.
- Qyzmetkerlerdiń jaǵdaiy: Qamqorshylyq qyzmetkerlerine kólik berilmeidi, jalaqylary tómen.
- Jalaqyny arttyrý: Qyzmetkerler jalaqysyn 50%-ǵa arttyrý máselesin qarastyrdyq. Buny úsh aimaqtan basqa barlyq aimaq qoldap, kelisim berdi.
Balalardyń quqyqtaryn qorǵaý júiesiniń tiimdiligin arttyrý úshin bul qadamdar óte mańyzdy.
Buǵan deiin Shymkentte alty balany qamqorlyǵyna alyp, olardy qinady dep kúdikke ilingen azamattyń ústinen qylmystyq is qozǵalǵanyn jazǵan boltynbyz.
