Ótken árbir on jyldyq atqarǵan missiiasy turǵysynan ǵasyrdyń júgin arqalap tur. Bul týraly Táýelsizdik kúni qarsańynda ótken Memlekettik nagradalardy tapsyrý rásiminde QR Prezidenti Qasym-Jomart Toqaev aitty, dep habarlaidy "Ult aqparat".
«Ótken árbir on jyldyq atqarǵan missiiasy turǵysynan ǵasyrdyń júgin arqalap tur. Alǵashqy on jyldyq egemen Qazaqstannyń óz derbestigin qalyptastyrý kezeńi boldy. Ekinshi on jyldyqta elimiz tuǵyryn nyqtap, keregesin keńeitip, irgesin bekitti. Úshinshi on jyldyqta memleketimiz shyn máninde, kemeline kelip, álemdik saiasattyń tórine ozdy. Aldaǵy tórtinshi on jyldyqta bizdi jańa mindetter kútip tur. Elimizdi ilgeri damytyp, árbir azamattyń laiyqty turmysyn qamtamasyz etýimiz kerek», - dedi Qasym-Jomart Toqaev.
QR Prezidentiniń paiymynsha, ony júzege asyrýdyń basty joly – tiimdi basqarý júiesi.
«Men Joldaýymda memlekettik basqarýdyń jańa úlgisine basa mán bergenimdi bilesizder. Osyǵan orai, kóptegen naqty sharalar atqarylýda. Jalpy, jańǵyrýdyń jan-jaqty bolǵany jón. Búkil halqymyz zaman aǵymyna ilese bilýge tiis. Ózgeristerge beiimdele alatyn jurt qana ýaqyt tynysyn dóp basady. Biz bilimdi ári bilikti, uqypty jáne jaýapty, isker de eńbekqor jurt bolýymyz qajet. Bul – Uly Abai aitqandai, «tolyq adamnyń» aiqyn kórinisi. Oǵan qosa, árkimniń jeke qasieti men maqsaty eldik múddemen tyǵyz astasyp, patriotizmge ulasýy kerek. Sonda ǵana memleketshildik ideiasy basty qundylyqqa ainalady», - dedi Memleket basshysy.
