Foto: Sportty damytý direktsiiasy
Qazaqstandyq bylǵary qolǵap sheberi Nurbek Oralbai Ózbekstan astanasy Tashkentte ótip jatqan bokstan álem chempionatynda el qorjynyna tórtinshi altyn saldy.
80 kelige deiingi salmaq dárejesinde baq synaǵan Nurbek Qytai qazaǵy Toqtarbek Tańathanmen judyryqtasty. Otandasymyz qarsylasynan úsh raýndta da basym bop, jeńiske jetti.
Sonymen, bokstan álem chempionatynda Qazaqstan qorjynynda 4 altyn, bir kúmis medal bar.
Aita keteiik, búgin 54 kelige deiingi salmaq dárejesinde synǵa túsken qazaqstandyq Mahmud Sabyrhan ózbekstandyq Oibek Djýraevpen sharshy alańǵa shyǵyp, aiqyn basymdyqpen jeńdi. "Qazaqtyń Lomachenkosy" degen laqapatqa ie daryndy boksshy qarsylasyn eki ret nokdaýnǵa da jiberdi.
Al 71 kelige deiingi salmaq dárejesinde judyryqtasqan Aslanbek Shymbergenov ózbekstandyq Saidjamshid Djafarovpen jekpe-jekke shyqty. Qazaqstan ulttyq quramasynyń kapitany qarsylasynan birinshi jáne úshinshi raýndta basym tústi. Sóitip, tóreshiler sheshimimen jeńimpaz dep tanyldy.
Eske salaiyq, keshegi finalda grýziialyq boksshymen qolǵap túiistirgen Sanjar Táshkenbai el qorjynyna alǵashqy "altyndy" salǵan edi. Al 67 kelige deiingi salmaqta synǵa túsken taǵy bir otandasymyz Dýlat Bekbaýov ózbek boksshysy Asadhýdj Mýidinhýdjaevten jeńilip, kúmis júldeni qanaǵat tutty.
video: Qazaqstan ulttyq arnasy
