Prezident Qasym-Jomart Toqaev Qyrǵyzstannyń Sholpan-Ata qalasynda ótken Ortalyq Aziia jáne Ázerbaijan memleketteri basshylarynyń beiresmi konsýltativtik kezdesýine qatysty, dep habarlaidy ult.kz.
Memleket basshysyn áýejaida Qyrǵyzstan Ministrler kabinetiniń tóraǵasy – Prezident Ákimshiliginiń basshysy Adylbek Qasymaliev qarsy aldy.
Kezdesýde sóz sóilegen Qasym-Jomart Toqaev beiresmi jiyndy uiymdastyrǵany úshin Qyrǵyzstan Prezidenti Sadyr Japarovqa alǵys aityp, qazaq pen qyrǵyz halyqtarynyń baýyrlastyǵy men dostyǵynyń mańyzyn atap ótti. Prezidenttiń aitýynsha, Qyrǵyzstannyń damýy búkil Ortalyq Aziianyń turaqtylyǵy men órkendeýine oń áser etedi.
Memleket basshysy qazirgi kezeńde óńirlik yntymaqtastyq jańa deńgeige kóterilgenin aityp, «HHI ǵasyrda Ortalyq Aziiany damytý maqsatyndaǵy dostyq, tatý kórshilik jáne yntymaqtastyq týraly sharttyń» kúshine enýin mańyzdy tarihi oqiǵa dep baǵalady. Onyń pikirinshe, bul qujat memleketter arasyndaǵy strategiialyq seriktestiktiń jańa kezeńin bastap, ózara senimge negizdelgen óńirlik yqpaldastyqtyń berik irgetasyn qalaidy.
Toqaev Túrikmenstan Prezidenti Serdar Berdimuhamedovke atalǵan shartqa qosylǵany úshin alǵys bildirip, endigi kezekte qujatty iske asyrýǵa arnalǵan naqty is-sharalar josparyn ázirleýdi usyndy.
«Ózara senimniń nyǵaiýy men óńirlik yntymaqtastyqtyń qarqyndy damýynyń arqasynda Ortalyq Aziia jańa tarihyndaǵy asa tabysty kezeńdi bastan ótkerip jatyr dep nyq senimmen aitýǵa bolady», – dedi Prezident.
Sondai-aq Memleket basshysy Ázerbaijannyń konsýltativtik kezdesýlerdiń tolyqqandy múshesine ainalýy óńirlik yntymaqtastyqtyń jańa kezeńin bildiretinin atap ótti. Onyń aitýynsha, bul saiasi dialogty tereńdetýge, investitsiia, energetika, ónerkásip, kólik-logistika salalaryndaǵy yntymaqtastyqty keńeitýge múmkindik beredi.
Prezident sońǵy jyldary óńirishilik saýda kólemi artyp, birlesken kásiporyndar men investitsiialyq jobalar kóbeigenin, sondai-aq mádeni-gýmanitarlyq bailanystardyń nyǵaiyp kele jatqanyn aitty.
Qasym-Jomart Toqaev qazirgi tańda Ortalyq Aziianyń halyqaralyq arenadaǵy róli kúsheiip kele jatqanyn atap ótti. Buǵan mysal retinde Qyrǵyzstannyń 2027–2028 jyldarǵa arnalǵan BUU Qaýipsizdik Keńesiniń turaqty emes múshesi bolyp sailanýyn keltirip, qyrǵyz halqyn osy tarihi jetistikpen quttyqtady.
Prezident byltyr Tashkentte kóterilgen óńirlik yqpaldastyqty institýtsionaldyq turǵydan damytý bastamalarynyń áli de ózekti ekenin aityp, Qazaqstan dostyqty, tatý kórshilik pen strategiialyq seriktestikti nyǵaitýǵa baǵyttalǵan birlesken jumysty jalǵastyrýǵa daiyn ekenin jetkizdi.
