Memleket basshysy Qasym-Jomart Toqaev Quryltai sailaýy qarsańynda halyqqa úndeý jasap, bul saiasi naýqannyń el taǵdyryna tikelei áser etetin tarihi oqiǵa ekenin aitty, dep habarlaidy ult.kz.
Prezidenttiń sózinshe, Qazaqstan sońǵy jyldary aýqymdy reformalardy júzege asyryp, damý baǵytyn jańartqan. Onyń aitýynsha, eldegi birlik, kelisim men yntymaqtyń arqasynda Ádiletti Qazaqstandy qurý jolynda eleýli nátijelerge qol jetkizilgen. Sonymen qatar, atqarylatyn jumys áli de kóp ekenin atap ótti.
Toqaev aldaǵy sailaý halyq igiligine baǵyttalǵan jańa reformalarǵa jol ashyp, Qazaqstan tarihyndaǵy jańa kezeńniń bastalýyna yqpal etetinin jetkizdi.
Memleket basshysy partiialarǵa sailaýǵa sapaly daiyndalýǵa múmkindik berý úshin Quryltai sailaýynyń ótetin ýaqytyn aldyn ala jariialaǵanyn aitty. Onyń pikirinshe, bul sheshim alǵashqy sailaý naýqanynyń mazmundy, ashyq, básekeli ári órkenietti ótýine múmkindik bergen.
Prezident sondai-aq el azamattarynyń sailaý barysyna qatysty pikirleri osy baǵyttyń durys tańdalǵanyn kórsetkenin atap ótti.
