Almaty oblysynyń əkimi Amandyq Batalov Kegen jəne Raiymbek aýdandaryndaǵy taý bókterlerin zertteýdi tapsyrdy.
Búgin oblys əkimi Kólsai saiyna ushyp kelip, jedel shtabtyń jumysyna qatysty, dep habarlady Almaty oblysy əkiminiń baspasóz qyzmeti.
22 səýirdegi jaǵdai týraly oblys əkimine QR IIM TJK «Qazseldenqorǵaý» MM basshysy Toqtar Baimoldaev baiandady.
"Opyrylǵan lai kóshkini Kólsai kóliniń arnasyna jetti. Topyraqtyń qozǵalysy saǵatyna bir metrden jyljýda. Topyraq kóldiń arnasyn jaýyp tastaýy múmkin. Biraq kól jańa arnamen aǵýy yqtimal. Qazir odan eki tekshe metr sý ótip jatyr. Mamyr aiynyń aiaǵy men maýsymnyń basynda ótkiziletin sý kólemi 30 tekshe metrge jetedi. Topyraq massasy kól sýy arqyly shaiylady. Biraq bul kól túbinde kishkentai bólshekterdiń paida bolýyna yqpal etip, onyń arnasynan asýyna alyp kelýi múmkin. Biz sý ótkizýdi evakýatsiialyq kanal arqyly qamtamasyz etsek deimiz. Bul oraida jarylys jumystary qoldanylýy múmkin, - dedi Toqtar Baimoldaev.
Sarapshylardyń pikirin tyńdai kele Amandyq Batalov birqatar tapsyrmalar berdi. Eń aldymen, onyń saǵasynyń túbin shynjyr tabandy ekskavatorlar arqyly tereńdetý. Eger taý massasy kóldi jaýyp tastasa, sýdy sarqyp alý nemese sifondyq ədis arqyly morenalyq kólderge ótkizý təsilin qoldaný kerek.
"8 səýirde bul jerde jer silkinisi bolǵan, onyń artynan jaýyn jaýdy. Munda tektonikalyq jarylý syzyǵy bar. Osynyń bəri jinaqtala kele, qalyptasyp otyrǵan jaǵdaidy týǵyzýy múmkin. Qazir taý bókterlerine, əsirese eldi mekender mańyna muqiiat zertteý jasaý kerek», - dedi Amandyq Batalov.
Sonymen qatar, oblys əkimi elektr jelileriniń ainalma jolyn jəne geologiialyq jaǵdailardy eskere otyryp jol salý jumystaryn jalǵastyrýdy tapsyrdy.
Qazir oqiǵa ornyna barlyq qajetti tehnika jumyldyrylǵan, taý massasynyń qozǵalysy saǵat saiyn baqylanyp otyr. Eldi mekenderge qaýip tónip turǵan joq. Sondai-aq oblys əkiminiń baspasóz qyzmetinen habarlaǵandai, keibir BAQ-ta jariialanǵan Saty aýylyna aparatyn jol jabyldy degen aqparat shyndyqqa janaspaidy. Bul jol jabylǵan joq, ashyq. Taý massasynyń qozǵalýy «Kólsai kólderi» Ulttyq saiabaǵy kardony mańynda oryn alǵan.
