Atyraýda tońazytqyshta qaitys bolǵan sábi ólimine kúdikti dárigerlerge qatysty sot úkimi ózgerissiz qaldy, dep habarlaidy QazAqparat.
Búgin oblystyq sottyń baspasóz qyzmetinen málim etkendei, Atyraý oblystyq sotynyń qylmystyq ister jónindegi sot alqasynyń qaýlysymen «Atyraý oblystyq perinataldyq ortalyǵy» dárigerlerine qatysty Atyraý oblysynyń qylmystyq ister jónindegi mamandandyrylǵan aýdanaralyq sotynyń úkimi ózgerissiz qaldy.
«Budan buryn birinshi satydaǵy sot úkimimen «Atyraý oblystyq perinataldyq ortalyǵy» kásiporny direktory K.Nysanbaev Qazaqstan Respýblikasynyń Qylmystyq Kodeksiniń 99-baby, 2-bóligi 3,7,14-tarmaqtarymen (aldyn ala sóz bailasý arqyly bir top adammen dármensiz kúidegi kámeletke tolmaǵan adamdy óltirý), 361-baby, 1- bóligi (laýazymdyq ókilettigin teris paidalaný), 24-baby, 3-bóligi, 367-baby, 2-bóligi (para berýge oqtalý) kináli dep tanylyp, oǵan 18 jyl merzimge bas bostandyǵynan aiyrý jazasy, kezekshi dáriger A.Qaiyrjan jáne akýsher J.Kýlbatirova Qylmystyq Kodeksiniń 99-babynyń 2-bóliginiń 3,7,14-tarmaqtarymen kináli dep tanylyp, A.Qaiyrjanǵa 16 jyl, J.Kýlbatirovaǵa 15 jyl merzimge bas bostandyǵynan aiyrý jazasy, neonatolog-dárigerler D.Djýmabaeva, R.Nýrmahanbetov Qylmystyq Kodeksiniń 434-babymen (qylmys týraly habarlamaý) kináli dep tanylyp, olarǵa 3 jylǵa bas bostandyǵyn shekteý jazasy taǵaiyndaldy. Sottalýshylardyń kinási birinshi instantsiia sotynda zerttelgen dáleldemer jiyntyǵymen, kýágerlerdiń jaýabymen, saraptama qorytyndysymen tolyǵymen óz dálelin tapqan», - dep habarlady sottyń baspasóz qyzmeti.
Sot alqasy sottalǵandardyń qylmys jasaǵany óz dálelin tapqany, jazanyń túri men merzimi jasaǵan áreketterine, zań talaptaryna sai taǵaiyndalǵany týraly tujyrymǵa keldi.
