«Tomiris» filminiń qazaq tilindegi nusqasy kinoteatrlardan kórsetile bastady, dep habarlaidy "Ult aqparat".
Bul týraly filmniń rejisseri Aqan Sataev óziniń Instagram paraqshasynda jazdy.
«Dostar, búginnen bastap, «Tomiris» filminiń tolyq qazaqsha nusqasyn bizdiń «Meloman» distribiýtor kompaniiamyz kinoteatrlarǵa tarata bastady. Kinomyzdyń qazaqsha nusqasyn kútip qalǵandaryńyz úshin, shyn júregimizden keshirim suraimyz», - dep jazdy rejisser.
Aita keteiik, áleýmettik jeli qoldanýshylary týyndynyń tek qana orys tilinde júrip jatqanyn aityp, qazaq kinosynyń qazaq tilinde kórsetilmeýine narazylyq bildirgen edi.
Rejisser filmniń qazaq tilinde dybystalǵan nusqasy bar ekenin, titrlerdi latyn álipbiinde jazǵanda grammatikalyq qateler ketkenin túsindirdi .
«Top músheleri men akterlerdiń aty-jóni qujatqa sáikes kelmeýine bailanysty keshiktirilip jatyr. Quqyqtyq turǵydan biz kartinany mundai qatelerimen kórsetilimge jibere almaimyz. Shuǵyl túrde atalmysh máseleni sheship jatyrmyz», - dedi A. Sataev.
Tarihi dramada kishkentai Tomiristiń Saq patshaiymy laýazymyna deiingi ómir joly kórsetiledi. Onda Saq taipalarynyń Parsy patshasy Kirge qarsy joryǵy kórinis tapqan jáne keiipkerler ejelgi túrki, ejelgi parsy tilderinde sóileidi.
Oǵan elimizdiń tanymal kinojuldyzdary Dimash Ahimov, Erik Joljaqsynov, Baikenje Belbaev, Berik Aitjanov, Erkebulan Daiyrov, Murat Bisembin, Azamat Satybaldy, Ádil Ahmetov, Aijan Laidji, Aian Ótepbergen, Asylhan Tólepov, Ashat Úrpekovter túsken.
Film 27 qyrkúiekte prokatqa shyqty.
