Máskeýdiń Izmailovsk aýdandyq alqabiler soty kollegiiasy Daǵystan úkimetiniń burynǵy tóraǵasynyń uly Murtazáli Medjidovty kináli dep tanydy. Ol Máskeý memlekettik halyqaralyq qatynastar institýtynyń stýdenti, Qazaqstan azamaty Tomiris Baisafany óltirdi degen kúdikke ilingen. Sot Medjidovty 13 jylǵa bas bostandyǵynan aiyrdy.
Bul aqparatty Máskeý qalalyq sotyna silteme jasaǵan qalalyq jańalyqtar agenttigi habarlady.
Eske salaiyq, 2018 jyly Tomiris Baisafany ózi oqityn oqý orny jataqhanasy terezesiniń túbinen taýyp alǵan. Kóp uzamai ol alǵan jaraqatynan aýrýhanada qaitys bolǵan. Kýágerler sózinshe, onyń ólimine Medjidovpen aradaǵy konflikt sebep bolǵan. Medjidovke bastapqyda "kisi ólimine deiin jetkizdi" degen aiyp taǵylyp, keiin ony "kisi óltirdi" degen bapqa aýystyrǵan. Prokýratýra sózine qaraǵanda, Medvedov ony áýeli uryp-soǵyp, sodan soń terezeden iterip jibergen.
2021 jyly maýsymda Máskeýdiń Nikýlinsk soty Medjidovty aqtap alǵan. Qarasha aiynda Máskeý qalalyq soty isti qaita qaraýǵa jibergen. Al, biyl qańtarda prokýratýra isti Izmailovsk sotyna bergen, óitkeni Nikýlinsk sotynyń isti qaita qaraǵanda obektivti sheshim shyǵaratynyna kúmándanǵan, dep jazady Kavkaz.Realii saity.
Aita keteiik, qylmys jasaǵan azamattyń ákesi Muhtar Medjidov Daǵystan úkimetin 2013 jyldyń qańtar-shilde ailarynda basqarǵan. Oǵan deiin vitse-premer jáne aimaqtaǵy zań shyǵarý ókildiginiń depýtaty bolǵan. 2020 jyly Resei qorǵanys ministrliginiń múlkin "jymqyrdy" degen aiyppen qamaýǵa alynǵan.
