7 maýsymda Resei astanasynda alqabiler soty Máskeý memlekettik halyqaralyq qatynastar institýtynyń stýdenti, qazaqstandyq Tomiris Baisafany óltirý isinde úkim shyǵardy, - dep habarlaidy "Ult aqparat" Tengrinews.kz agenttigine silteme jasap.
Istiń bas figýranty - Daǵystannyń burynǵy premer-ministriniń uly Mýrtýzali Medjidov aqtalyp shyqty.
"Medjidov 105-baptyń 1-bóligi boiynsha alqabilerdiń úkimine sáikes aqtaldy. Erteń saǵat 9:30-da úkim jariialanady", - dep habarlady Nikýlin aýdandyq sotynyń baspasóz qyzmeti.
"Kinásiz, sot zalynda bostandyqqa shyqty (...) Qurmetti dostar, ony (Mýrtýzali Medjidovti aityp otyr) kinásiz dep tapty. Ne aitarymdy da bilmeimin...", - dep jazdy marqumnyń anasy Janna Ahmetova.
Eske salaiyq, 2018 jyldyń 13 sáýirinde MMHQI Halyqaralyq ekonomikalyq qatynastar kafedrasynyń tórtinshi kýrs stýdenti Tomiris Baisafa jumbaq jaǵdaida JOO-nyń tórtinshi qabatynyń terezesinen qulap ketken. Aýyr jaraqat alyp, kóp qan joǵaltqan. Sol jyldyń 3 mamyrynda Tomiris Sklifosovskii ǵylymi-zertteý institýtynda qaitys boldy.
Qyzdy óltirdi degen kúdikpen Daǵystannyń burynǵy premer-ministriniń uly Mýrtýzali Medjidov ustalǵan edi.
Keiinirek Tomiristiń týystary onyń ólimi kezdeisoq tragediia emes dep esepteitinin málimdedi. Óitkeni tergeýdiń birinshi kezeńinde tótenshe jaǵdai bolǵan sátte bólmede onyń kýrstasy bolǵany anyqtalǵan. Tergeý eki jyl boiy bul oqys oqiǵa emes, adam óltirý faktisi bolǵanyna dálel jinaqtady.
Buǵan deiin qyzdyń anasy jańa tergeýshi tergeý sharalary tolyq kólemde júrgizilmegendikten, "ýaqyty ótip ketti" dep esepteitinin aitqan bolatyn. Ol qajetti materialdar alynbaǵanyn, tiisti saraptamalar jasalmaǵanyn aitty. Janna Ahmetova muny tergeýshiler ádeii istegenin málimdegen edi.
Ótken jyldyń qazan aiynda qyzdyń anasy Toqaevpen kezdesti. Prezident bul oqiǵany jeke baqylaýyna alǵan bolatyn.
