«Aýyl» HDPP tóraǵasynyń birinshi orynbasary Tóleýtai Raqymbekov «El amanaty» jalpyulttyq saýalnamasynyń nátijesin jariialady, dep habarlaidy QazAqparat.
Ortalyq kommýnikatsiialar qyzmetinde «Aýyl» partiiasynyń músheleri baspasóz máslihatyn ótkizdi. Shara barysynda Tóleýtai Raqymbekovtiń aitýynsha saýalnamaǵa búkil respýblika boiynsha 212 658 qazaqstandyq qatysqan.
«Partiialyq aktiv saýalnama negizinde 14 problemany aiqyndap aldy. Olardyń ishinde jeteýin saýalnamaǵa qatysýshylar 100 paiyz eń ózekti másele retinde kóterip otyr. Olar: shetel azamattaryna jerdiń jalǵa berilýine jáne satylýyna tyiym salý, jańa áleýmettik saiasatty qurý, ár balaǵa járdemaqy berý, aýyldy eldimekenderde ońtailandyrý jyldarynda jabylyp qalǵan meditsinalyq mekemelerdiń jumysyn jandandyrý, búkil aýyldy, onyń ishindegi shalǵaidaǵy aýyldardyń barlyǵyn internetpen qamtamasyz etý, shaǵyn, orta biznes ókilderi men fermerlerge 2-4 paiyzben nesie berý, sonymen qatar olardyń kommýnaldyq shyǵyndaryn sýbsidiialaý, shetelden keletin qandastardyń Qazaqstan Respýblikasynyń azamattyǵyn alýyn jeńildetý, tiimsiz baǵdarlamalarǵa milliardtap qarajat jumsaýdy toqtatý», - dedi Tóleýtai Raqymbekov.
Onyń aitýynsha respondentter 14 suraqtan basqa, ózderin alańdatyp júrgen problemalardy da kórsetken. Sonyń ishinde 17 854 biýlletende qosymsha máseleler kórsetilgen. Mysaly, 1000-nan astam adam saýalnamadaǵy 10 problemalyq máseleni belgilegen. Olar:
1. Aýyz sý, gazben jabdyqtaý, internet boiynsha - 3 671 usynys;
2. Aýyl sharýashylyǵy óndirýshilerin memlekettik qoldaýdy jetildirý, nesieler men sýbsidiialardyń qoljetimdiligi, kooperatsiia negizinde ádil baǵalar boiynsha aýyl sharýashylyǵy ónimderin satyp alý jáne ótkizý júiesin qurý – 2 787 usynys;
3. Azyq-túlik qaýipsizdigin qamtamasyz etý, baǵanyń ósýine jáne quramynda GMO bar ónimderdi satýǵa jol bermeý;
4. Ipotekany tóleýge múmkindik bolmaǵan jaǵdaida turǵyn úidi keiin satyp alý múmkindigin qarastyra otyryp jalǵa beriletin turǵyn úi sanatyna aýystyrý. 2 758 respondent osyndai usynys jasady;
5. 2 448 respondent jastar úshin jumys oryndaryn ashýdy, onyń ishinde zeinetkerlik jasty tómendetý arqyly ony kóbeitýdi usyndy.
6. Pandemiiaǵa bailanysty qyzmetin shinara nemese tolyq toqtatqan kásipkerlerge 2 jylǵa deiin nesielik demalys berý týraly 2 141 respondent usynys jasady.
7. 1 793 respondent turǵyn úi alý, sharýashylyq júrgizý jáne kásipkerlik qyzmet úshin kreditter bere otyryp, jumys kúshi artylǵan ońtústik óńirlerden jumys kúshi tapshy soltústik óńirlerge ishki kóshi-qondy yntalandyrý týraly aitqan.
8. Stýdentter úshin avtobýstarda, poiyzdarda jáne ushaqtarda júrý tarifterin 30 paiyzdan bastap 50% - ǵa deiingi jeńildikti qalpyna keltirý týraly 1 974 respondent usynys jasaǵan.
9. Sport alańdary men stadiondar salý, ár aýylda Densaýlyq saqtaý jáne mádeniet mekemelerin qalpyna keltirý boiynsha – 1 174 usynys.
10. Sýarmaly jáne jaiylymdyq jerlerdi qalpyna keltirý jáne tiimdi paidalaný týraly 2 171 usynys tústi.
Saýalnama júrgizý kezinde qoǵam men memlekettiń eń ózekti problemalary retinde kórsetilgen bul usynystar mindetti túrde partiianyń baǵdarlamasyna engizilmek.
