Elimizde aýyl sharýashylyǵy salasyn kadrmen tolyq qamtý úshin qazirgidei 22 emes, 3 agrarlyq ýniversitet jetkilikti. Ulttyq qoǵamdyq senim keńesiniń múshesi Tóleýtai Rahymbekov keńes otyrysynda osylai dedi, dep habarlaidy QazAqparat.
«Argentina, Braziliia, Izrail sekildi elder innovatsiiany keńinen qoldaný arqyly aýyl sharýashylyǵy salasynda naqty jetistikterge qol jetkizdi. Nátijesinde osy elder azyq-túlik importtaýshylardan eksporttaýshylar boiynsha álemdik kóshbasshylarǵa ainaldy. Qazaqstan da osy elder siiaqty bola alady. Ol úshin aýyl sharýashylyǵyn ǵylymi qoldaýǵa jáne jappai jumysshylardan bastap joǵary bilimi bar mamandarǵa deiingi kadrlardy daiarlaýǵa erekshe nazar aýdarý qajet. Búgingi tańda oqytý sapasy men oqý bitirgennen keiin jumyspen qamtýdyń tómen deńgeiine qatysty kóptegen syn aitylady. Bul problemalardy sheshý úshin JOO-lardy profildeý kerek dep esepteimin. Meniń oiymsha, salany qajetti kadrmen qamtamasyz etý úshin qazirgidei 22 ýniversitet emes, úsh agrarlyq ýniversitettiń múmkindigi tolyǵymen jetkilikti», - dedi Tóleýtai Rahymbekov Ulttyq qoǵamdyq senim keńesiniń kezekti otyrysynda.
Onyń aitýynsha, túlekterdi mamandyǵy boiynsha jumyspen qamtý úshin Prezidenttiń jeke, qosalqy sharýashylyqtardy damytý týraly tapsyrmasyn iske asyrýǵa - tutastai aýyl sharýashylyǵy ónimin óndirýshilerdiń kooperatsiiasy múmkindik beredi.
«Kooperativter aýyldy damytýdyń áleýmettik, ekonomikalyq jáne saiasi negizi bola alady», - dedi ol.
