JAMAN BOLA ALMAIDY, BOLǴANDY KÓRE ALMAIDY
nemese
qaralaý, aiaqtan shalýdyń kezegi Nurjan Tólendievke jetipti
Nurjan Tólendiev – moiyndalǵan talant. Bútin halyqty moiyndatyp, sahnadan oiyp oryn ala bilý kóp ónerpazǵa buiyra bermeitin baq. Halyqtyń syny qai kezde de qatal. Halyqty jai, bolmashy jyltyraqpen aldaý múmkin emes.
Nurjan Tólendiev – qazaqtyń qazirgi zamanǵy satira ónerine, komediia janryna silkinis ákelip, qazaqy qaljyńǵa ádemi lep berip jasqa da, jasamysqa da tanymal bolǵan jan.
Boiyna bitken erekshe ártistik qabileti, sheshendigi, baiqampazdyǵy, qarapaiymdylyǵy, eńbekqorlyǵy jinaqtala, shyńdala kele halyqtyń ulyna ainaldy.
Zaman ózgerisi adamnyń kásibine de ózgeris ákeledi. Ras, ánshi, ártis, bishi, tilshi, aqyndardyń kóbisin toida kezdestiretin bolǵanymyz da ras. Bul bir jaǵynan halyqtyń qalaýy. Ózderi qurmetteitin óner adamdarymen etene jaqyn bolǵysy keletin qazaqy minez de osyny qajet etedi. Tipti toilaryna sheteldikterdi de myńdaǵan, milliondaǵan dollarmen shaqyratyndar da bar ǵoi. Ol endi basqa taqyryp.
Óz taqyrybymyzǵa oralsaq, 15.08.2016 kúngi «Zamana» gazetine G.Halyqqyzy degen avtordyń «Toiǵa jaldaǵan asabańyz alǵan aqshasyn aqtady ma?» degen taqyryptaǵy maqalasy jaryq kórdi. Nurjan Tólendievtiń jeke basyna tiisýge arnalǵan tapsyrysty maqala onyń qol jetkizgen jetistikterin, halyq aldyndaǵy abyroiyn kóre almaityn baqyrashtardyń tarapynan jasalǵan kezekti jol tosý áreketi degennen basqa aitarymyz joq. Nurjannyń atyn qaralaý arqyly ózderiniń atyn shyǵarǵysy kelgenderdiń de peiili anyq kórinip tur.
Aqyn Muhtar Shahanovtyń osy turǵyda:
...Atyńdy, dańqyńdy shyǵarǵyń kelse osy zamanda,
Jerden ap, jerge sap ataqty tulǵany jamanda.
Zorlyǵyń erlikke telinip, zoraiyp baǵań da,
Bir kúnde-aq belgili bolasyń qoǵamǵa... degeni ainymai kelip tur.
Senbi kúni «Eki juldyz» saltanat saraiynda úilený toi ótkizgen toi iesi men sol toida bastan-aiaq qatysqan kýágerdiń de sóilegen videosy «Mediada N.Tólendievke qarsy jasalǵan arandatýlardy toi ieleri men kýágerler joqqa shyǵarýda» degen taqyrypta ǵalamtorǵa júktelipti.
«Japtym jala, jaqtym kúielerine» eldiń kózi naqty aiǵaqty kóre sala jetedi. Budan keiin endi avtor – G.Halyqqyzy men maqalany jariialardan buryn istiń aq-qarasyn ajyratyp almaǵan gazet redaktsiiasy qandai ýáj aitar eken.
Baspasózdiń, medianyń keide «boiaýshy, boiaýshy dese saqalyn boiapty» degendei, «túimedeidi túiedei etip, bolmaǵandy boldyǵa» jatqyzyp jiberetin tusy bar. Jel sózdi der kezinde toqtatpasa, aýa jaiyla tez tarap, ózgelerdi ilandyra túsetini de ras. Sondyqtan Nurjan Tólendiev óziniń azamattyq quqyǵyn qorǵai otyryp, negizsiz qaralaý maqalany jariialaǵany úshin redaktsiiadan jáne avtordan gazet betinde keshirim suraýdy talap etýi kerek.
Nurjan Tólendievtiń talantynyń ólshemi men ónerpazdyq baǵasyn jalǵan piarshylar emes, halyq áldeqashan berip qoiǵanyn keibireýler áli de bilmei júrgen siiaqty. Áitpese, budan buryn da qanshama toidy júrgizip júrgen tájiribesi bar, óz kásibinde kemeldengen Nurjan Tólendiev dál ondai soraqy sózderdi qoldanyp, ospadar qaljyń aitty degenge kim senedi. Olai bolatyn bolsa «el qulaǵy – elý» baiaǵyda-aq onyń oǵash qylyqtary týraly jariia bolar edi.
«Jaqsynyń artynan sóz eredi» degen sóz bar halyqta. Qańqý, ósek-aiań, qaralaý, aiaqtan shalýdyń kezegi Nurjan Tólendievke jetipti. Biraq mundai usaqtyq, jalǵan jala onyń saǵyn syndyra almaitynyna senimdimiz.
Aidar Naýryzbaev
Túrkistan qalalyq sazdy-drama teatrynyń aktery, rejissery.
«M.Shoqaidyń 125-jyldyǵy», RF-nyń «Adal Eńbegi Úshin» tósbelgileriniń iegeri
Ult portaly
