Foto: Akorda.kz
Búgin kórnekti qalamger Tólen Ábdikuly Memleket basshysy Qasym-Jomart Toqaevtyń qolynan «Qazaqstannyń halyq jazýshysy» ataǵyn aldy, dep habarlaidy Kazinform.
«Halyq jazýshysy degen ataqty kezinde ózimiz jaýyp tastap edik. Sony búgin qaitadan ashyp, bizdi ári uialtyp, ári qýantyp otyrsyz. Bul bizge qosymsha asa talap qoia qoimas. Biraq ónerge, ádebietke degen jańa kózqarastyń belgisi bolyp, kóńilimizdi úlken senimge toltyryp otyr. Ómirde ádildik, shyndyq, adamgershilik degen uly qundylyqtar bar. Adami qarym-qatynas, is-áreket, qoǵamnyń ómiri, memlekettiń saiasaty soǵan negizdelgen kezde órkeniet kóshine qosylýǵa múmkindik ashylady. Sol kóshti bastaý Sizge júkteldi. Bul árine, asa qasterli, biraq, asa jaýapty nárse ekenin bilemiz. Qazaqtyń kóshin týra bastap, basqa jolǵa burylmai, kedergilerge urynbai halyqtyń úmitin aqtaǵan abyroily Prezident bolǵanyńyzdy qalaimyz», - dedi qalamger Aqordada ótken saltanatty rásimde.
Osy rette jazýshy italiialyq bir memleket qairatkeriniń «Biz Italiiany jasadyq. Endi italiandyqtardy jasaiyq» degen áigili sózin eske saldy.
«Biz de ilgerindi-keiindi Qazaqstandy jasadyq. Endi kózi ashyq, sanasy erkin, ǵylym men bilimdi meńgergen, ózge ozyq oily eldermen boi teńestire alatyn zamanaýi Qazaq ultyn jasaýǵa kúsh salý kerek dep esepteimiz. Bul, árine, ortaq mindet. Bizde qolymyzdan kelgenshe tyrysyp baǵamyz. Damý degen jańa bir zatqa qol jetkizý emes. Ótken qatelikterdi túzeý, qisaiǵandy túzetý, qulaǵandy qalpyna keltirý», - dedi Tólen Ábdikuly.
